पर्ये: सत्तरी तालुक्यातील मोर्ले गावातून वाहणाऱ्या वाळवंटी नदीच्या संरक्षणासाठी स्थानिक युवकांनी पुढाकार घेतला असून रविवार २७ रोजी स्वच्छता मोहीम राबविण्यात येणार आहे. यावेळी युवकांनी मोठ्या संख्येने सहभागी व्हावी, असे आवाहन आयोजकांनी केले आहे.

उन्हाळ्यात या नदीतील ‘उभो गुणो’, ‘मधले तळप’ आणि ‘करकार’ या डोहांमध्ये आंघोळी करण्यासाठी मोठ्या संख्येने पर्यटक येतात. मात्र, हे पर्यटक नदीकिनारी धांगडधिंगा करणे, जेवण बनवणे, मद्यपान करणे आणि प्लास्टिक व दारूच्या बाटल्यांचा कचरा फेकून परिसर विद्रूप करत आहेत. त्यामुळे या ठिकाणी पर्यटकांना बंदी घालावी आणि नदीकाठ सुशोभित ठेवावा, अशी जोरदार मागणी स्थानिकांकडून करण्यात येत आहे.

स्थानिकांनी उपजिल्हाधिकारी तसेच मोर्ले व केरी ग्रामपंचायतीकडे लेखी निवेदन सादर करून पर्यटकांवर बंदी घालण्याची मागणी केली आहे. प्रशासनाकडून कोणतीही ठोस कारवाई न झाल्यामुळे आता स्थानिक युवकांनीच पुढाकार घेत, बाहेरील पर्यटकांना येथे येऊ न देण्याचा इशारा दिला आहे. याचबरोबर नदीच्या रक्षणासाठी ‘आमची नदी वाचवूया’ या नावाने सोशल मीडियावर ग्रुप तयार करून जनजागृतीही सुरू करण्यात आली आहे.

जागृती अभियान

‘उभो गुणो’ आणि ‘करकार’ या ठिकाणी गेल्या काही दिवसांत नदीत बुडून दोन मृत्यूची प्रकरणे घडली आहेत. त्यामुळे संतप्त झालेल्या स्थानिकांनी अशा दुर्घटना पुन्हा होऊ नयेत आणि नदी परिसर सुरक्षित राहावा, यासाठी जागृती अभियान सुरू केले आहे. या अभियानाचा एक भाग म्हणून येत्या रविवारी, २७ एप्रिल रोजी सकाळच्या सत्रात ‘उभो गुणो’ ते ‘करकार कोंड’ पर्यंत नदी पात्राची स्वच्छता मोहीम राबवण्यात येणार आहे.