पद्माकर केळकर

वाळपई येथील उत्तर गोवा विभागाचे केंद्रीय जवाहर नवोदय विद्यालयात इयत्ता अकरावी, बारावीसाठी विज्ञान शाखा नाही. त्यामुळे दहावी उत्तीर्ण झालेल्या विद्यार्थ्यांना काणकोण येथील नवोदय विद्यालयात अकरावी विज्ञान शाखेसाठी प्रवेश घ्यावा लागत होता. त्यावरून पालक संघटनेच्या इयत्ता दहावीच्या 58 पालकांनी मिळून पालक सुबोध देसाई व राजेंद्र गावस यांच्या मार्गदर्शनाखाली मुंबई उच्च न्यायालयाच्या गोवा खंडपिठात एक जनहित याचिका दाखल केली होती.

त्याला यश मिळाले असून यावर्षी जुलै पासून 11 वी विज्ञान वर्ग सुरू होणार आहेत. तब्बल 34 वर्षांनी पहिल्यांदाच विज्ञान वर्ग विद्यार्थ्यांसाठी उपलब्ध होणार आहे. उच्च न्यायालयाने आदेश दिल्यानंतर नवोदय समितीच्या पुणे विभागाने दखल घेत वर्ग सुरू होण्यासाठी हालचाली वेगवान केल्या होत्या. त्याची कामे प्रगतिपथावर असून विज्ञानवर्गासाठी लागणारी साधन सामुग्री विद्यालयात पोहचली आहे.

प्रयोगशाळा तसेच वर्ग इत्यादी गोष्टी शेवटच्या टप्प्यात आहेत. वाळपई नवोदय विद्यालयात विज्ञान शाखा अकरावी, बारावीसाठी सुरू करावी, अशी मागणी करण्यात आली होती. या मागणीस अनुसरून पालकांनी काही महिन्यांपूर्वी जनहित याचिका दाखल केली होती. उच्च न्यायालयाचे वरिष्ठ वकील ॲड. शशिकांत जोशी यांनी सामाजिक बांधिलकीच्या भावनेने कामकाज हाताळले आहे.

न्यायालयीन लढ्यामुळे यश मिळाले असून अँड. शशिकांत जोशींनी दिलेल्या समर्पित भावनेच्या सेवेमुळे सत्तरीतील विद्यालयात नवे बळ मिळाले आहे. आता केवळ विद्यालयाच्या जमीन मालकीचा विषय पूर्णत्वास येण्याची गरज आहे. त्यासाठीही न्यायालयीन लढाई सुरु आहे, असे सुबोध देसाई म्हणाले.

इतर विद्यालयांच्या विद्यार्थ्यांनाही प्रवेश !

पालक संघटनेचे प्रमुख याचिकादार सुबोध देसाई म्हणाले,की वाळपई नवोदय विद्यालयात उत्तर गोव्यातून विविध भागातून विद्यार्थी पाचवीत प्रवेश घेतात. परंतु दहावी नंतर जर विज्ञान शाखेत प्रवेश घ्यायचा असेल तर मग काणकोण येथील नवोदय विद्यालयात धाव घ्यावी लागत होती. पण आता विज्ञान वर्ग विद्यार्थ्यांना उपलब्ध होणार आहे. यावर्षी सुरवातीला 40 विद्यार्थ्यांना प्रवेश दिला जाईल. त्यात प्रथम प्राधान्य नवोदय विद्यालयाच्या विद्यार्थ्यांना असणार आहे. व अन्य बाहेरील विद्यार्थ्यांना देखील प्रवेश दिला जाईल.