गुळेली : कणकिरे गुळेली येथे वाळपई - फोंडा मार्गावर आंब्याचे झाड कोसळल्यामुळे या भागातील वाहतूक सुमारे दिड तास ठप्प झाली. वाळपई व फोंडा येथील अग्निशमन दलाच्या जवानांनी घटनास्थळी येऊन झाड हटवून वाहतूक खुली केली.

या विषयी सविस्तर माहिती अशी की, कणकिरे येथील म्होवकण या ठिकाणी वाळपई फोंडा मार्गालगत असलेल्या आंब्याच्या झाडाचा एक भाग आज सकाळी ७.४५ च्या दरम्यान मधोमध रस्त्यावर कोसळला.

या कोसळलेल्या झाडामुळे रस्ता पूर्णपणे बंद झाला. दुचाकी किंवा पादचाऱ्यांना चालूनसुद्धा जाता येत नसल्याने दोन्ही बाजूंनी रस्त्यावर वाहनांच्या रांगा लागल्या. दरम्यान, या ठिकाणी असलेल्या फडते यांच्या घराजवळून काहींनी दुचाकी व चारचाकीसाठी रस्ता काढला.

झाडे कापण्याची मागणी

वाळपई - फोंडा मार्गावर अनेक ठिकाणी अशाप्रकारची धोकादायक झाडे आहेत. ती झाडे या ठिकाणाहून हटवावी किंवा त्या झाडांच्या किमान मोठमोठ्या फांद्या छाटाव्या, अशी मागणी या भागातून प्रवास करणाऱ्या प्रवाशांनी तसेच नागरिकांनी केली आहे. आता वारा पाऊस नसताना चांगले उभे असलेले झाड अशाप्रकारे कोसळल्यामुळे संबंधित यंत्रणेने इतर झाडाबद्दल विचार करावा, अशी मागणी होत आहे.

अनर्थ टळला

सकाळची वेळ असल्याने फोंडा, मडगाव, पणजी, बांबोळीकडे जाणाऱ्या लोकांमुळे हा रस्ता नेहमी वर्दळीचा असतो, पण झाड कोसळले तेव्हा सुदैवाने रस्त्यावर कोणी नव्हते. या भागातून प्रवास करणाऱ्या खासगी बसगाड्या, कदंब, कामगारांना ने आण करणाऱ्या खासगी कंपन्यांच्या बसगाड्या, ट्रक, कामावर जाणारे लोक, विद्यार्थी झाड पडल्याने अडकून पडले होते.