वाळपई: वाळपई परिसरात अल्पवयीन दुचाकी चालविणाऱ्या विद्यार्थ्यांवर पोलिसांनी मोठी कारवाई सुरू केली आहे. वाहतूक परवाना नसताना दुचाकी चालविणाऱ्या चार विद्यार्थ्यांना बुधवारी दुपारी शाळा सुटल्यानंतर दुचाकीसह ताब्यात घेतले.

त्या विद्यार्थ्यांना नंतर पोलिस स्थानकात पालकांसह बोलविले. मात्र, पकडलेल्या विद्यार्थ्यांसह पालकांना समज देऊन पहिली वेळ म्हणून सोडून देण्यात आले. पण यापुढे वाहतूक परवाना नसताना विद्यार्थी आढळल्यास, विद्यार्थी (Student) व संबंधित पालकांवर कायदेशीर कारवाई करत दंड आकारला जाणार आहे. त्यासाठी वाळपई पोलिस सर्व शाळांना पत्र पठवून सूचना करणार आहेत करणार असल्याची माहिती पोलिस उपअधीक्षक जीवबा दळवी यांनी वाळपई पोलिस स्थानकात दिली. यावेळी त्यांच्यासोबत वाळपई पोलिस निरीक्षक विदेश शिरोडकर उपस्थित होते.

पालकांना दिली सूचना

दळवी म्हणाले की, दिवसेंदिवस वाढणाऱ्या अपघातांवर आळा बसला पाहिजे. जोपर्यंत कारवाही होत नाही, तोपर्यंत मुलांना व पालकांना समाज येणार नाही. वाळपई भागात मोठ्या प्रमाणात शाळकरी मुले दुचाकी घेऊन फिरताना आढळत आहेत त्यामुळे आज वाळपई बाजारात पोलिसांतर्फे ही कारवाई करण्यात आली. यावेळी पालक व विद्यार्थ्यांना दळवी यांनी सूचना केल्या तसेच पालक मुलांना अल्पवयीन असूनही वाहन देतात त्यामुळे तुमच्यावर सर्वांत आधी कारवाई केली जाईल, अशी सूचना दिली.