Valpoi Police Raid At Illegal sand Mining at Naneli Sattari

वाळूपई: वाळपई पोलिसांनी नानेली-सत्तरी येथे अवैध रेती उत्खननप्रकरणी छापा टाकून सहाजणांवर गुन्हा दाखल केला आहे. या कारवाईत एक टाटा टिप्पर ट्रक (जीए-०४-टी-२१०६) आणि रेती उत्खननासाठी वापरण्यात येणारी साधने जप्त करण्यात आली आहेत.

डिचोली उपअधीक्षक जीवबा दळवी यांच्या मार्गदर्शनाखाली पोलिस उपनिरीक्षक खुशाली नाईक आणि त्यांच्या पथकाला नगरगाव परिसरात गस्त घालत असताना रेती उत्खननाच्या अवैध कामाची माहिती मिळाली. तत्काळ नानेली येथील कालिका नदीकाठावर पोहोचल्यावर, चार मजूर वाळू उत्खनन करत असल्याचे त्यांच्या निदर्शनास आले. याठिकाणी एका महिलेने मजुरांना रेती उत्खननाचे काम दिल्याचे स्पष्ट झाले. पोलिस उपनिरीक्षक खुशाली नाईक यांनी घटनास्थळी पंचनामा करून वाहन आणि उपकरणे जप्त केली.

याप्रकरणी संगीता नाईक, शंकर भगत, राजीव कुमार (२६), सकिंद्र दि. उमेश राजक, असरश दि. धथुरी भगत, उदय दि. चंद्रकांत परवार यांच्यावर गोवा दमन आणि दीव लघु खनिज अधिसूचना नियम, १९८५ अंतर्गत विविध कलमांनुसार गुन्हा दाखल करण्यात आला आहे. पुढील तपास वाळपई पोलिस ठाण्याच्या सनीशा नाईक यांच्या नेतृत्वाखाली सुरू आहे.

दरम्यान, सत्तरीत म्हादई नदीच्या खोऱ्यात बेकायदेशीर रेती उत्खनन करण्याचे काम खुलेआम सुरूच आहे. त्यात काही दिवसांपूर्वी सावर्डे येथे रेती उत्खनन करताना एका महिलेचा मृत्यू झाला होता.