वाळपई: येथील नवोदय विद्यालयाजवळील म्हादई नदीच्या पात्रात एका तरुणाच्या बुडण्याची घटना सोमवारी सायंकाळी सुमारे ५.२० वाजण्याच्या सुमारास घडली. बुडालेल्या तरुणाचे नाव मबुली पटेल (२७) असे असून तो मडगाव येथील आहे.

घटनेची माहिती मिळताच वाळपई अग्निशमन दलाचे जवान घटनास्थळी दाखल झाले व शोधमोहीम सुरू करण्यात आली. मात्र, रात्री उशिरापर्यंत त्याचा शोध लागला नव्हता. रात्री ८.३५ वाजता शोधमोहीम थांबविण्यात आली. सकाळी पुन्हा शोधमोहीम राबविण्यात येणार आहे.

या शोधकार्यात अग्निशमन दलाचे अधिकारी संतोष गावस, एलएफएफ अरविंद देसाई, डीपीटी अशोक नाईक, फायर फायटर कलीदास गावकर, ज्ञानेश्वर सावंत, साईनाथ सावंत, प्रतेश गावकर, वरिष्ठ फायर फायटर दत्ताराम देसाई तसेच ऑफ-ड्युटी फायर फायटर उमेश गावकर आणि स्वप्निल धालवी यांनी सहभाग घेतला.

मिळालेल्या माहितीनुसार, ईदनिमित्त शनिवारी मबुली पटेल हा वाळपई येथे आपल्या पाहुण्यांकडे आला होता. संध्याकाळी आंघोळीसाठी नदीपात्रात गेला असता पाण्याचा अंदाज न आल्याने तो बुडाला. याप्रकरणी पोलिस उपनिरीक्षक सोहम मळीक पुढील तपास करीत आहेत.

दरम्यान, म्हादई पात्रातील बहुतेक बंधारे अडवलेले असल्याने नदीतील पाण्याचा अंदाज येत नाही. उन्हाळा सुरू झाल्याने सध्या अनेक लोक या नदीवर आंघोळीसाठी येतात. काहीजण नशापाणी करून दंगामस्तीही करतात व नाहक आपला जीव गमावून बसतात. त्यामुळे बंधारा परिसरात नदीपात्रात उतरण्यावर सरकारने बंदी घालावी, अशी मागणी स्थानिकांकडून होत आहे.