पणजी: अमली पदार्थ बाळगल्याप्रकरणी गोवा पोलिसांनी उझबेकिस्तानच्या महिलेला अटक केली आहे. सिक्वेरी बीच येथे कळंगुट पोलिसांनी केलेल्या धडक कारवाईत उझबेकिस्तानी महिलेला अटक करण्यात आली. 21 सप्टेंबर रोजी पोलिसांनी ही कारवाई केली.

जुमेवा अमीरा (42) असे अटक करण्यात आलेल्या संशयित आरोपी महिलेचे नाव आहे.

अटक करण्यात आलेल्या उझबेकिस्तानच्या महिलेकडे बेकायदेशीर अमली पदार्थ आढळून आला आहे. हा अमली पदार्थ कोकेन असल्याचा संशय आहे, पोलिसांच्या एका निवेदनात म्हटले आहे.

महिलेजवळ आढलेल्या अमली पदार्थाचे वजन 12.05 ग्रॅम असून, त्याची अंदाजे किंमत 1 लाख 20 हजार रुपये आहे.

कळंगुट पोलिसांनी दिलेल्या माहितीनुसार, एक महिला अमली पदार्थाची विक्री करण्यासाठी सिक्वेरी समुद्रकिनारी येणार असल्याची माहिती पोलिसांना विश्वसनीय सुत्रांकडून मिळाली. पोलिसांनी मिळालेल्या माहितीच्या आधारे सिक्वेरी समुद्रकिनारा परिसरात सापळा रचून संशयित महिलेला अटक केली.

महिलेजवळ एक लाख 20 हजार रुपयांचे अमली पदार्थ मिळाले असून, महिलेविरोधात एनडीपीएस कायदा 1985 अन्वये गुन्हा दाखल केला आहे. पोलिस अधिक तपास करतायेत.