बंगळुरू विमानतळाचा अधिकारी असल्याचे सांगून टॅक्सी ऑपरेटरची फसवणूक केल्याचा प्रकार उघडकीस आला आहे. वैमानिक आणि इतर अधिकाऱ्यांना विमानतळावर ने-जा करण्यासाठी गाड्यांची गरज असल्याचा दावा केला. तसेच, त्याचे वजन एवढे आहे को तो टॅक्सी ऑपरेटरला विमानतळासाठी लागणाऱ्या गाड्यांचे कंत्राट देईल, असे आश्वासनही दिले.

संशयित ओसामाच्या आमिषाला बळी पडून ऑपरेटरने मर्सिडीजसह तीन गाड्या त्याला दिली. याशिवाय विविध सुरक्षा रक्कम जमा करण्याच्या नावाखाली लाखो रुपयेही दिले.

ओसामा या मर्सिडीजमध्ये गोवा आणि मुंबईत फिरायला जात होता. प्रकरण उघडकीस आल्यानंतर संशयित आरोपीविरुद्ध फसवणुकीचा गुन्हा दाखल करण्यात आला आहे.

मोहम्मद साजिद हा टॅक्सी व्यावसायिक आहे. पोलिसांना दिलेल्या तक्रारीनुसार, ओसामा नावाच्या व्यक्तीने तो बंगळुरू विमानतळावर एचआर म्हणून काम करत असल्याचे सांगितले.

विमानतळावर दररोज गाड्या लागतात, असे ओसामाने त्याला सांगितले. साजिदने सुरुवातीला एक कार दिली. त्यानंतर 12 लाख रुपयांना दुसरी कार खरेदी करून दिली. पण बड्या अधिकाऱ्यांसाठी आलिशान कार हवीय, असे सांगितले.

साजिदने मित्रांकडून आणि बँकेतून कर्ज घेऊन 55 लाख रुपयांची मर्सिडीजही खरेदी केली. जुलै महिन्यात साजिदकडून ओसामा मर्सिडीज गाडी घेऊन गेला.

मात्र महिना पूर्ण होऊनही भाड्याच्या नावाखाली एक रुपयाही त्याला मिळाला नाही. दरम्यान, ओसामाने स्वत:ला विमानतळ अधिकारी म्हणून घोषित करण्यासाठी जी काही कागदपत्रे दाखवली होती ती बनावट असल्याचे साजिदला समजले.

संशयित ओसामा मर्सिडीजमधून मित्रांसोबत कधी मुंबई तर कधी गोव्याला फिरत असतो, अशी माहितीही साजिदला मिळाली. पीडित साजिद यांच्या तक्रारीवरुन आरोपीविरुद्ध बांभूळपुरा पोलिस ठाण्यात फसवणुकीचा गुन्हा दाखल केला आहे.