पणजी: पणजी शहरातील नागरिकांच्या काही समस्या आहेत, त्या समस्या सोडवण्याचे काम स्थानिक आमदाराचे आहे. परंतु पणजीत आमदार नागरिकांच्या समस्या जाणून घेण्यासाठी येत नाहीत, तर नागरिकांना त्यांच्याकडे जाऊन समस्या मांडाव्या लागतात, अशी स्थिती आहे. परंतु ज्यांनी आमच्याकडे समस्या मांडल्या, त्याची सोडवणूक करण्यासाठी संबंधित अधिकाऱ्यांकडे प्रश्न मांडणे आवश्यक आहे आणि आपण ते काम करीत आहोत, असे उत्पल पर्रीकर म्हणाले.

उत्पल यांनी जिल्हाधिकाऱ्यांना निवेदन सादर करून आल्यानंतर वरील मत माडंले. त्यांनी दिलेल्या निवेदनात म्हटले आहे की, पणजीतील एम. जी. रोडच्या बाजूच्या घारसे टॉवरजवळील रहिवाशांना पार्किंग सुविधेशी संबंधित दैनंदिन समस्येला तोंड द्यावे लागत आहे.

या इमारतीतील रहिवाशांनी अलिकडेच आपल्याकडे हा प्रश्न माडंला होता. बऱ्याच काळापासून, या निवासी इमारतीतील विशिष्ट जागा घारसे टॉवरमधील रहिवासी त्यांच्या दुचाकी पार्किंगसाठी वापरत आहेत. अलीकडेच, हे क्षेत्र अधिकृतपणे केवळ चारचाकी पार्किंगसाठी चिन्हांकित केले आहे.

मुख्य मुद्दा असा आहे की, त्या जागेवर चारचाकीऐवजी अधिकतर दुचाकी वाहने बसू शकतात. परंतु नव्या धारणेमुळे स्थानिक रहिवाशांच्या दुचाकी पार्किंग पर्यायांवर मर्यादा आल्या आहेत, ज्यामुळे त्यांना त्यांच्या घरापासून बराच अंतरावर आपली वाहने पार्क करावी लागताहेत. ही परिस्थिती स्थानिकांसाठी अडचणीची आणि सुरक्षिततेच्या समस्या निर्माण करते.

नाहक पडतो पाचशे रुपयांचा भुर्दंड

जे रहिवासी गरज नसताना जवळच्या उपलब्ध जागेत (आता अधिकृतपणे चारचाकी वाहनांसाठी चिन्हांकित) त्यांची दुचाकी पार्क करतात, परंतु त्यांच्या नावे पाचशे रुपयांचे चलन फाडले जात आहे. त्यामुळे या प्रकरणात आपण वैयक्तिक हस्तक्षेप करावा, तसेच पार्किंग सुविधांचा आढावा घ्यावा व त्यानुसार वाहतूक पोलिसांना निर्देश द्यावेत, अशी मागणी रहिवाशांनी केली आहे, असे उत्पल पर्रीकर यांनी सांगितले.