पणजी: आंतरराष्ट्रीय स्तरावर कच्च्या तेलाच्या किमती वाढल्या आहेत. केवळ पेट्रोलचा वापर केल्यास त्याची किंमत प्रतिलिटर २०० रुपयांहून अधिक होऊ शकते. त्यामुळे इथेनॉलमिश्रित पेट्रोलच्या माध्यमातून इंधनाचे दर स्थिर ठेवण्याचा प्रयत्न केला जात आहे.

ई-२० इंधनामुळे समस्या जाणवत असतील, तर नागरिकांनी स्पीड किंवा पॉवर पेट्रोलचा वापर करावा, असे मत आमदार नीलेश काब्राल यांनी लक्षवेधी सूचनेवरील चर्चेदरम्यान व्यक्त केले.वाहन खरेदी करणाऱ्यांकडे इंधन खरेदीची क्षमता असते. देशहितासाठी अशा प्रकारचे निर्णय घ्यावे लागतात, असेही काब्राल यांनी सांगितले.

इंधनामुळे वाहनांना समस्या जाणवत असल्यास राज्यातील पायलटांसाठी सरकारची ईव्ही वाहन खरेदी योजना आहे. टॅक्सी व्यावसायिकांनीही ईव्ही चारचाकी वाहनांचा वापर करावा, असे काब्राल यांनी सुचविले.

‘हा तर जखमेवर मीठ चोळण्याचा प्रकार’

सरकारी पक्षाकडून केवळ आमदार काब्राल यांनी या विषयावर भूमिका मांडली. मात्र, ‘नागरिकांना परवडत नसेल तर स्पीड किंवा पॉवर पेट्रोल वापरा’ असा सल्ला देणे म्हणजे त्‍यांच्या जखमेवर मीठ चोळण्याचा प्रकार असल्याची टीका सरदेसाई यांनी केली.