Sunburn Goa 2023: हजारो पोलिसांचा बंदोबस्त, अल्कोहोल आणि अमली पदार्थ तपाणीसाठी मशीन्स आणि जागोजागी पोलिसांची नजर तरीही सनबर्नमध्ये गैरप्रकार होत असल्याची चर्चा सध्या गोव्यात रंगली आहे. सनबर्न महोत्सवाच्या पहिल्या दिवशी महोत्सवात दोन मुलींची प्रकृती अचानक बिघडली, त्यानंतर दुसऱ्या दिवशी असाच एक प्रकार घडला असून, एक तरुणाची तब्येत बिघडली.

महोत्सवात अमली पदार्थ सेवन केल्याने त्यांची प्रकृती बिघडल्याची चर्चा सर्वत्र सुरु आहे.

सनबर्न महोत्सवाच्या पहिल्या दिवशी ध्वनी मर्यादेचे उल्लंघन केल्याने एक स्टेज पोलिसांनी बंद केले. महोत्सवाची सागंता झाल्यानंतर दोन मुली अस्वस्थ झाल्याचा व्हिडिओ समोर आला. मुलींना रुग्णवाहिकेद्वारे तात्काळ रुग्णालयात दाखल करण्यात आले.

दुसऱ्या दिवशी देखील अशाच प्रकारची एक घटना समोर आली. यात एक तरुण अस्वस्थ झाल्यानंतर त्याला रुग्णालयात दाखल करण्यात आले.

दरम्यान, महोत्सवात अमली पदार्थ सेवन केल्याने त्यांची तब्येत बिघडली अशी चर्चा सध्या सुरु आहे. पोलीस बंदोबस्त आणि वारंवार तपासणी होत असताना देखील महोत्सवात अमली पदार्थाची विक्री होतेय का? असा प्रश्न उपस्थित केला जात आहे.

यावर्षी सनबर्न महोत्सव विविध कारणांनी चर्चेत आला, महोत्सवात ध्वनी मर्यादेचे पालन करण्याचे आदेश न्यायालयाने आयोजक समितीने दिले आहेत. याचा पहिल्याच दिवशी प्रत्यय आला, ध्वनी मर्यादेचे उल्लंघन केल्याने पोलिसांनी महोत्सवाचे एक स्टेज नऊ वाजताच बंद केले.

तसेच, महोत्सवादरम्यान महादेवाचा फोटो वापरल्याने आप नेते अमित पालेकरांनी हा सनातन धर्माचा अपमान असल्याचे म्हणत आयोजकांविरोधात गुन्हा दाखल करण्याची मागणी केली. पोलीस महासंचालकांनी याची दखल घेण्याची मागणी त्यांनी ट्विटद्वारे केलीय.