मडगाव : गोव्यात लग्न समारंभासाठी आलेल्या हरियाणा येथील एका पर्यटक जोडप्यांचे दागिने चोरीला गेले आहे. तब्बल साडे पाच लाखांचे दागिने बाणावली येथील पंच तारांकित हॉटेलमधून चोरीला जाण्याची घटना काल मंगळवारी रात्री घडली आहे.

बाणावली येथील मेरिएट हॉटेलमध्ये हा लग्न समारंभ आयोजित करण्यात आला होता. त्यासाठी फरीदाबाद येथील नवनीत शर्मा हे आपल्या पत्नीसह आले होते. त्यांनी आपल्या खोलीत सोन्याचे दागिने ठेवले होते. ती दोघे रात्री 9 च्या सुमारास लग्न समारंभाला जाऊन रात्री 10 वाजण्याच्या सुमारास परत आले असता त्यांच्या खोलीत चोरी झाल्याचे त्यांच्या लक्षात आले.

चोरटा खोलीचे स्लाईडिंग दरवाजा उघडून आत येऊन दागिने घेऊन फरार झाल्याचं उघड झालं आहे. या प्रकरणी कोलवा पोलीस स्थानकात तक्रार दाखल करण्यात आली आहे. हॉटेलच्या सीसीटीव्हीच्या आधारे अज्ञात चोरट्याचा शोध पोलिसांनी सुरु केला आहे. तसंच अजून कुणाचे दागिने चोरीला गेलेत का याचाही तपास पोलिस करणार आहेत.