पणजी: म्हादईसारख्या प्रश्नावर कर्नाटकातील खासदार पक्ष, मतभेद विसरून एकत्र येतात. त्यामुळे गोव्यातील भाजपचे लोकसभेचे खासदार श्रीपाद नाईक, राज्यसभा खासदार सदानंद शेट तानावडे, गोव्यासाठी पक्ष सोडून एकत्र येऊन लढा देऊया, असे आवाहन दक्षिण गोव्याचे खासदार विरियातो फर्नांडिस यांनी केले.

पत्रकार परिषदेस प्रदेश काँग्रेसचे सरचिटणीस श्रीनिवास खलप, दक्षिण गोवा काँग्रेस जिल्हाध्यक्ष सावियो डिसिल्वा यांची उपस्थिती होती. खासदार विरियातो म्हणाले, लोकसभेच्या अधिवेशनाच्या काळात आपण आठ महिन्यांत गोव्याचे आणि देशाच्या हिताचे विषय मांडले.

सरकार पुरेसे गंभीर

म्‍हादई नदीचे पाणी कर्नाटकाने पळवू नये यासाठी सरकार पुरेसे गंभीर आहे असे मत मुख्यमंत्री सावंत यांनी काही दिवसांपूर्वी मांडले होते. म्हादईविषयक खटले सर्वोच्च न्यायालयात कधी सुनावणीस येणार याविषयी राज्य सरकारकडे निश्चित माहिती नाही. प्रवाह अधिकारीणीची बैठकही महिनाभर लांबणीवर टाकण्यात आली आहे.असे असले तरी राज्य सरकारला याप्रश्नी आपली बाजू भक्कम आहे, असे वाटते.