मडगाव : आपली नको असलेली भानगड आपला पुतण्या बाहेर फोडेल या भीतीने काकानेच आपल्या 13 वर्षीय पुतण्याला 35 फूट खोल विहीरीत फेकून देण्याची घटना कुडतरी येथे घडली असून या प्रकरणी मायणा - कुडतरी पोलिसांनी बसवराज कागी (45) याला अटक केली आहे.

ही घटना काल सायंकाळी घडली. संशयित कागी हा मोतीडोंगर परिसरात राहात असून काल सायंकाळी त्याने आपल्या पुतण्याला रानात एका झाडाला चांगले आंबे लागले आहेत ते तुला दाखवतो असे सांगून कुडतरी येथील जंगलात आणले. तिथे एक 35 फूट खोल विहीर असून त्याने त्याला त्या विहिरीजवळ आणले. आणि जवळपास कुणी नसल्याचे पाहून त्याला विहिरीत ढकलून दिले. आणि घटनास्थळावरून पळ काढला.

मात्र त्या मुलाच्या सुदैवाने त्या विहिरीला चढून वर येण्यासाठी दगड लावले असून त्या मुलाने रात्रीच्या काळोखातही मोठा धीर दाखवीत त्या दगडांच्या साहाय्याने वर चढत आपला जीव वाचविला.

नंतर त्याने कसेबसे घर गाठले. आपल्यावर गुदरलेला प्रसंग त्याने घरच्यांना सांगितल्यावर त्यांनी पोलीस तक्रार दाखल केली. सदर मुलगा जखमी झाल्याने त्याला इस्पितळात दाखल केले. आज सकाळी फरार असलेल्या त्याच्या काकाला अटक केली.

मिळालेल्या माहितीनुसार संशयित कागी याचे एक लफडे होते आणि त्याची माहिती या मुलाला होती. आपली ही भानगड बाहेर येणार या भीतीने त्याने आपल्या पुतण्याला जिवंत मारण्यासाठी त्या विहिरीत ढकलून दिले.

मायणा कुडतरी पोलिसांनी दिलेल्या माहितीनुसार या आरोपीच्या विरोधात बाल अत्याचार प्रतिबंधक कायद्याखाली तसेच खुनाचा प्रयत्न केल्याचा गुन्हा नोंद केला आहे.