Mulgao Accident

डिचोली: मुळगाव येथील मुख्य रस्त्यावर दोन दुचाकींमध्ये झालेल्या अपघातात दोन्ही दुचाकीचालक जखमी झाले. अपघात घडला त्यावेळी रस्त्यावरून एकही वाहन ये-जा करीत नव्हते, त्यामुळे रस्त्यावर मधोमध पडलेले दोन्ही युवक सुदैवाने बचावले. हा अपघात रविवारी सकाळी तांबडारस्ता जंक्शनजवळ घडला.

अपघातात जखमी झालेला एक युवक मुळगाव परिसरातील तर दुसरा युवक पेडणेतील असल्याची माहिती अपघात स्थळावरून मिळाली. उपलब्ध माहितीनुसार जीए-०४-पी-२६४२ या क्रमांकाची स्कूटर अस्नोड्याहून मुळगावच्या दिशेने येत होती. तर जीए-११-सी-५६८८ या क्रमांकाची स्कूटर अस्नोड्याच्या दिशेने जात होती.

मुळगावच्या तांबडा रस्ता जंक्शनकडे पोचताच दोन्ही स्कूटर समोरासमोर धडकल्या. त्यात दोन्ही स्कूटरचालक रस्त्यावर पडून जखमी झाले. अपघातानंतर स्थानिक लोक घटनास्थळी जमा झाले. त्यांनी १०८ रुग्णवाहिकेला पाचारण करून जखमी युवकांना उपचारासाठी डिचोलीच्या सामाजिक आरोग्य केंद्रात पाठवले. प्राथमिक उपचार करून दोन्ही युवकांना नंतर घरी पाठवण्यात आल्याची माहिती मिळाली.