बार्देश: गोव्यात बेकायदेशीरपणे वास्तव्य करणाऱ्या रशियन मायलेकाला अटक करण्यात आली आहे. शिवोली, बार्देश येथे दोघेही बेकायदेशीरपणे वास्तव्य करत होते. वैध व्हिसाशिवाय वास्तव्य केल्याप्रकरणी गुन्हे शाखेने दोघांना अटक केली आहे.

अँड्री ब्लिझनेतसोव्ह (वय ४८) आणि ब्लिझनेतसोव्हा ल्युडमिला (वय ७५) असे अटक करण्यात आलेल्या रशियन माललेकाचे नाव आहे. दोघेही घर नं. २९६३/३ दांडो, शिवोली, बार्देश - गोवा येथे वैध व्हिसाशिवाय वास्तव्य करत होते. गुन्हे शाखेला याबाबत माहिती मिळताच त्यांनी घटनास्थळी दाखल होत दोघांना अटक केली.

पोलिसांनी याप्रकरणी कलम ७(१) (३) परदेशी कायदा १९४६ कलम १४ अंतर्गत गुन्हा नोंद करत दोघांना अटक केली आहे. पोलिस उपअधीक्षक राजेश कुमार, गुन्हे शाखेचे अधीक्षक राहुल गुप्ता यांच्या मार्गदर्शनाखाली पोलिस निरीक्षक किशोर रामानन याप्रकरणाचा अधिक तपास करत आहेत.

वैध कागदपत्राशिवाय भारतात राहणे कायद्याने गुन्हा आहे. याप्रकरणी गोव्यात पर्यटनासाठी किंवा कामानिमित्त येणाऱ्या विदेशी पर्यटकांची वारंवार पोलिसांच्या वतीने तपासणी केली जाते. यापूर्वी देखील राज्यात अवैध पद्धतीने वास्तव्य केल्याप्रकरणी विदेशी नागरिकांना अटक करण्यात आली आहे.