Agonda News : आगोंद येथील कासव संवर्धन केंद्र स्थलांतरित करण्याच्या मागणीवरून वन अधिकाऱ्यांसमोरच दोन गट भिडले. यावेळी दोन्ही गटात बरीच बाचाबाची झाली. मात्र प्रकरण हातघाईवर येण्यापूर्वी जैव विविधता व्यवस्थापन समिती सदस्यांनी हस्तक्षेप केल्याने कोणताही अनुचित प्रकार घडला नाही.

आगोंद येथील कासव संवर्धन केंद्र स्थलांतरित करण्याच्या आगोंद पंचायत व आगोंद पेरीशतर्फे सादर केलेल्या निवेदनाची दखल घेऊन वन अधिकारी राजेश नाईक यांनी प्रकल्प अधिकारी नैस्टर फर्नांडिस व वनरक्षकांसमवेत बुधवारी या केंद्राचे निरिक्षण केले. यावेळी हा प्रकार घडला.

यावेळी सरपंच प्रिटल‌ फर्नांडिस, जैव विविधता व्यवस्थापन समिती अध्यक्ष शाबा गावकर, सदस्य नारायण देसाई, संजील नाईक गांवकर, प्रकाश फळदेसाई, उपसरपंच कैनिशा फर्नांडिस, पंच रामनाथ वेळीप, जोन फर्नांडिस, करुणा फळदेसाई,

फातिमा रॉड्रिग्ज, नीलेश पागी, तक्रारदार आगोंद पेरीशचे खजिनदार फ्रैंकी फर्नांडिस, मुख्यत्यार ब्राजो फर्नांडिस, आग्नेल फर्नांडिस, रूपा पागी, टिपू पागी, ईस्तैव फर्नांडिस, किशोर फळदेसाई, स्टीवी रॉड्रिक्स व अन्य उपस्थित होते.

कासव संवर्धन केंद्र हे हंगामी स्वरूपाचे असल्याने संरक्षित किनाऱ्यावर ते कुठेही उभारले जाऊ शकते. याबाबत तज्ज्ञ व वरिष्ठ योग्य निर्णय घेतील, असे वन अधिकारी राजेश नाईक यांनी स्पष्ट केले. यावेळी माजी पंच आग्नेलो फर्नांडिस समर्थक व माजी पंच टिपू पागी समर्थकांमध्ये बाचाबाची झाली.

जागा बदलू नये : पागी

मोरजी, गाल्जिबाग व आगोंद अशी एकूण ३ ठिकाणी ओलिव्ह रिडले कासवांसाठी हंगामी संवर्धन केंद्र १९९८ साली उभारली जातात. आगोंद किनाऱ्यावर आतापर्यंत ५ वेळा जागा बदलण्यात आली आहे. सध्या असलेल्या संवर्धन केंद्राची जागा लगेच बदलण्याची गरज नाही, असे माजी पंच टिपू पागी यांनी यावेळी सांगितले.

केंद्रासाठी जागा अयोग्य : फर्नांडिस

हे केंद्र कुणालाही विश्वासात न घेता उभारले असून ते एका खासगी शाळेजवळ आहे, त्यामुळे रिडले कासवांची संख्या घटेल. ही जागा कासव संवर्धन केंद्रासाठी योग्य नाही. हे केंद्र अन्यत्र हलवावे, असे सरपंच प्रिटल‌ फर्नांडिस,आगोंद पेरीशचे फ्रेंकी फर्नांडिस, ब्राजो फर्नांडिस यांनी सांगितले.

अहवाल वरिष्ठांना सादर करणार : नाईक

आगोंद समुद्र किनाऱ्यावर चार महिन्यांपूर्वी उभारलेले कासव संवर्धन केंद्र अन्यत्र हलवावे, अशी मागणी करणारे निवेदन आगोंद पेरीश व आगोंद पंचायतीतर्फे वन खात्याला सादर केले होते.

त्याची दखल घेऊन आपण या परिसराचे निरिक्षण केले. याबाबतचा अहवाल वरिष्ठांना सादर करण्यात येईल, असे वन अधिकारी राजेश नाईक यांनी यावेळी सांगितले.