Goa Tourism: गोव्यात पर्यटकांची संख्या घटली; गुदिन्हो, लोबोंच्या विधानानंतर पर्यटन मंत्री विधानसभेत म्हणाले, पर्यटनावर...

Goa Tourism: पर्यटनाची राजधानी म्हणून ओळखल्या जाणाऱ्या गोव्यात देशी-विदेशी पर्यटकांचा नेहमीच राबता असल्याचे चित्र काही वर्षांपूर्वी दिसत होते.

मात्र साधारणतः 2020 नंतर पर्यटकांनी गोव्याकडे पाठ फिरवली असून ख्रिसमस, 31 डिसेंबर आणि नंतरचे 2-3 दिवस सोडले तर त्यानंतर गोव्यात फारशी वर्दळ दिसली नाही.

गोव्याच्या शहरीभागासह ज्या ठिकाणी हटकून गर्दी दिसते अशा किनारी भागातही पर्यटकांची संख्या रोडावलेली दिसतेय.

बुधवारी विधानसभेत पर्यटन मंत्री रोहन खंवटे यांनी देखील गोव्याच्या पर्यटनात घट झाल्याचा पुनरुच्चार केला. कोरोना तसेच हमास- इस्राईल युद्धाचा परिणाम गोव्याच्या पर्यटनावर झालेला असल्याचे खंवटे म्हणाले.

तसेच याच विषयावर आमदार लोबो यांनीही काही कारणं विशद केली होती. विमान प्रवास महागला असून हॉटेलचे दर वाढल्यानेही पर्यटकांनी गोव्याकडे पाठ फिरवली आहे.

या महत्वाच्या कारणांमुळेच गेल्या 2-3 वर्षात पर्यटक संख्या रोडावली असल्याचे कळंगुटचे आमदार मायकल लोबो यांनी पत्रकारांशी बोलताना सांगितले.

तर औद्योगिक मंत्री माविन गुदिन्हो यांनीही गोवा महाग होत सल्याचे सांगत पर्यटक संख्या घटत असल्याचे काही दिवसांपूर्वी सांगितले होते.

मोपा विमानतळावरील ब्लू कॅप टॅक्सी काउंटरच्या उद्घाटनप्रसंगी बोलताना गुदिन्हो म्हणाले, पर्यटनाच्या दृष्टिने गोवा महाग होत चालला आहे.

टॅक्सीचे दर वाढले, हॉटेल्सचे रुम भाडे महाग झाले, एअरलायन्सची तिकटं महाग झाली. सगळ्याच बाजूंनी गोवा महाग होत चालला आहे. अशा परिस्थित गोव्यात यायचं की नाही याचा पर्यटक विचार करीत असल्याचे विधान गुदिन्हो यांनी केले होते.