Goa Fatal Accident

मडगाव: नेसाय येथील आयडीसी जंक्शनजवळ झालेल्या स्वयं अपघातात आल्वितो तावरीस (२४) वर्षीय दुचाकी चालक घटनास्थळी ठार झाला. तर धडे-सावर्डेत ट्रक व दोन दुचाकी अपघातात युवक अश्वेत गावकर ठार झाला.

नेसाय येथे रविवारी रात्री बाराच्या सुमारास अपघाताची ही घटना घडली. मृत अल्वितो सांज जुझे दि अरियाल येथील रहिवासी असून तो व्हेस्पा दुचाकीवरून येत होता. एका कुंपणाला त्याने जोरदार धडक दिली. त्याने हेल्मेट घातले नव्हते. डोक्याला जबरदस्त मार लागला व अपघातस्थळीच त्याला मरण आले. अपघाती मृत्यू म्हणून मायणा - कुडतरी पोलिसांनी हे प्रकरण नोंदवून घेतले आहे. पुढील पोलिस तपास चालू आहे.

दुसरीकडे धडे सावर्डे येथे सकाळी ८.४५ वा. ट्रक व दोन दुचाकीमध्ये झालेल्या अपघातात भांडोळ सावर्डे येथील अश्वेत गावकर (२४) या युवकाचे जागीच निधन झाले. सावर्डे येथील धोकादायक वळणावर कुडचडेमार्गे एक ट्रक येत होता तर विरुध्द दिशेने आपल्या घरी जाण्यासाठी अश्वेत आपल्या दुचाकीवरून येत होता.

सदर धोकादायक वळणावर ट्रकच्या पाठीमागून ओव्हरटेक करून एक दुचाकीस्वार अचानक आल्याने त्याने सरळ धडक अश्वेत याच्या दुचाकीला धडक दिल्याने अश्वेत ट्रकच्या चाकाखाली गेल्याने तो जागीच ठार झाला. कुडचडे पोलिसांनी घटनास्थळी धाव घेऊन घटनेचा पंचनामा करून गावकर यांचा मृतदेह उत्तरीय तपासणीसाठी मडगाव जिल्हा हॉस्पिटलमध्ये पाठवून देण्यात आला आहे.