म्हापसा: भरधाव वेगाने जाणाऱ्या ट्रकने दोन म्हशींना उडवल्याचा धक्कादायक प्रकार समोर आला आहे. म्हापसा शहराजवळ गिरी परिसरात ही घटना घडली आहे. या घटनेमुळे राष्ट्रीय महामार्गावर काहीकाळ वाहतूक विस्कळीत झाली होती. (Buffalo Accident in Mapusa Goa News)

मिळालेल्या माहितीनुसार, म्हापसा (Mapusa) शहराजवळ गिरी भागात सोमवारी एका भरधाव ट्रकची धडक म्हशींना बसली. ही धडक इतकी भीषण होती की दोन्ही म्हशींचा जागीच मृत्यू झाला. या घटनेनंतर मुंबई गोवा राष्ट्रीय महामार्ग 66 वर काहीकाळ वाहतुकीचा खोळंबा झाला होता. गेल्या आठवडाभर राज्यात ठिकठिकाणी अपघातांचे (Accident) प्रमाण वाढल्याचं चित्र आहे.

दरम्यान मुंबई गोवा महामार्गावर अनेकदा अपघातांमध्ये मुक्या जनावरांना आपला नाहक जीव गमवावा लागतो आहे. गेल्या अनेक वर्षांपासून सुरू असलेल्या महामार्गाच्या कामामुळे अपघातांचे प्रमाण वाढल्याचं दिसून येत आहे. यामुळे पर्यटक (Tourist) आणि कामानिमित्त या मार्गावर प्रवास करणाऱ्यांना मात्र जीव मुठीत घेऊन प्रवास करावा लागत असल्याचं चित्र आहे.