पणजी: तुये येथील सरकारी इस्पितळ व संशोधन केंद्र (गोमेकॉ सलग्न) २ फेब्रुवारीपासून सुरू करण्यासाठी सरकारने गतीने तयारी सुरू केली आहे. यासाठी कंत्राटी पद्धतीने कर्मचारी भरतीस राज्य मंत्रिमंडळाने आज मान्यता दिली.

मुख्यमंत्री डॉ. प्रमोद सावंत यांनी पत्रकार परिषदेत सांगितले की, २ फेब्रुवारी रोजी तुये येथील इस्पितळाचे उद्‍घाटन करण्यात येणार आहे. इस्पितळाच्या सुरुवातीच्या कामकाजासाठी तूर्त कंत्राटी पद्धतीने कर्मचारी नियुक्त केले जातील. त्‍यानंतर नियमित कर्मचारी भरती गोवा लोकसेवा आयोग व गोवा (Goa) कर्मचारी भरती आयोगाच्या माध्यमातून केली जाईल.

मुख्यमंत्री म्हणाले की, या इस्पितळासाठी सल्लागारही नेमण्यात येणार आहेत. तुये इस्पितळासह सांगेतील सार्वजनिक आरोग्य केंद्र आणि जिल्हा इस्पितळांतील आपत्कालीन कक्षांसाठी एकूण ९७ पदे कंत्राटी पद्धतीने भरण्यात येणार आहेत. बंदर कप्तान खात्यात उपकप्तान या नव्या पदाची निर्मिती केली आहे.

गोमेकॉत १५ पदे करार तत्त्‍वावर

गोवा वैद्यकीय महाविद्यालयातील सूक्ष्मजीवशास्त्र, शस्त्रक्रिया व नेत्ररोग विभागात व्याख्याते व साहाय्यक प्राध्यापक यासाठी १५ पदांची करार पद्धतीने भरती मंजूर करण्यात आली आहे. तसेच, आरोग्य खात्यातील विविध पदांची भरती ही नियमित नियुक्त्यांपूर्वी करार पद्धतीने केली जाणार आहे, असे मुख्‍यमंत्री प्रमोद सावंत यांनी सांगितले.

भरावयाची पदे

 परिचारिका : ५०

 रेडिओलॉजिस्ट : ५०

 एमटीएस : २५

 हाऊसकिपिंग स्टाफ : १०

 सिक्युरिटी स्टाफ : १०

 ईसीजी टेक्निशियन : १