मोरजी: तुयेतील सामुदायिक आरोग्य केंद्र नवीन इमारती स्थलांतरित करून त्याला उपजिल्हा इस्पितळाचा दर्जा देणार असल्याचे विधान आरोग्यमंत्री विश्वजीत राणे यांनी केले. मात्र याला तुये हॉस्पिटल कृती समितीने तीव्र आक्षेप घेतला आहे. या इमारतीत जीएमसीशी संलग्न व डींनच्या अख्यारित्याखाली इस्पितळ असावे, या मागणीचा पुनरुच्चार केला आहे. दरम्यान, नव्या इमारतीवर आरोग्य सामुदायिक केंद्राचा फलक लावल्यामुळे संभ्रम वाढला आहे.

तुये हॉस्पिटल कृती समितीची बैठक नुकतीच पेडणे येथे पार पाडली. यावेळी आरोग्य मंत्र्यांच्या विधानावर चर्चा करण्यात आली. तुये सामुदायिक केंद्र नवीन इमारतीत स्थलांतरित करून त्याला उपजिल्हा इस्पितळाचा दर्जा देण्यास यावेळी विरोध करण्यात आला.

ॲड. प्रसाद शहापूरकर यांनी याबाबत तीव्र नाराजी व्यक्त केली. पेणेकरांच्या डोळ्यात पाणी लावण्याचा हा प्रकार असल्याचा दावा त्यांनी केला. सर्व पंचायती व पालिकेने ठराव घेतला असतानाही सरकार आपलेच घोडे पुढे दामटण्याचा प्रयत्न करत आहे, याबाबत नाराजी व्यक्त करण्यात आली. नव्या इमारतीत सामुदायिक आरोग्य केंद्र स्थलांतरित केले तर त्याला आमचा विरोध असेल असे तुयेचे पंच नीलेश कांदोळकर यांनी सांगितले.

इमारत अजून ताब्यात नाही

आमदार जीत आरोलकर यांच्याकडे संपर्क साधला असता साधन सुविधा विकास महामंडळाने ही इमारत अजून आरोग्य खात्याच्या ताब्यात दिलेली नाही. त्यामुळे या इमारतीवर कोणता फलक लावला असेल तो चुकीच्या मार्गाने लावला असेल. या इमारतीत गोमेकॉशी संलग्न हॉस्पिटल सुरू करण्याची सरकारची योजना आहे, असे ते म्हणाले.