Tuyem: 'स्वच्छ तुये'साठी पंचायतीचा पुढाकार; उघड्यावर कचरा फेकताना आढळल्यास होणार 25 हजार रुपये दंड

Tuyem Panchayat Fine For Waste Dump

मोरजी: तुये पंचायत क्षेत्र कचरामुक्त करण्यासाठी सर्व ग्रामस्थांनी सहकार्य करण्याची गरज आहे. सध्या रस्त्याच्या बाजूला मोकळ्या जागेत मोठ्या प्रमाणात कचरा फेकला जातो. त्यामुळे परिसर दुर्गंधीमय आणि अस्वच्छ होतो. उघड्यावर कोणी कचरा फेकताना आढळला तर २५ हजार रुपये दंड करण्यात येईल, अशी माहिती तुयेचे पंच नीलेश कांदोळकर यांनी दिली.

प्रत्येक नागरिकाने, तसेच ज्यांच्याकडे भाडेकरू आहेत, त्यांचा सुका कचरा तुये पंचायतीचे कामगार दर आठवड्याला बुधवारी घरोघरी येऊन गोळा करतील. त्यांच्याकडे सुका कचरा द्यावा. जे कोणी कचरा रस्त्यालगत, मोकळ्या जागेत फेकतील, त्यांच्यावर दंडात्मक कारवाई करण्याचा ठरावही ग्रामपंचायत मंडळाने मंजूर केला आहे.

त्यामुळे सर्व नागरिकांनी कचरा इतरत्र न फेकता पंचायतीकडे द्यावा, असे आवाहन पंच नीलेश कांदोळकर यांनी केले. स्थानिक नागरिकांसोबत त्यांनी आपल्या प्रभागात घरोघरी जाऊन कचऱ्याविषयी जनजागृती केली. नंतर त्यांनी पत्रकारांना ही माहिती दिली.

गाव सुंदर राखण्यासाठी केवळ पंचायत मंडळानेच नव्हे, तर प्रत्येक नागरिकाने सहकार्य करण्याची गरज आहे. प्रत्येकाने आपली जबाबदारी ओळखून गाव कचरामुक्त करण्यासाठी प्रयत्न करावेत, असे आवाहन कांदोळकर यांनी केले.

ओल्या कचऱ्याचीही विल्हेवाट लावणार

सध्या पंचायत क्षेत्रातील सुका कचरा उचलण्यासाठी पंचायत मंडळ प्रयत्न करत आहे. भविष्यात ओल्या कचऱ्याचीही विल्हेवाट लावण्यासाठी पुढाकार घेतला जाईल. त्यासाठी अगोदर सर्व नागरिकांनी सुका कचरा पंचायतीच्या कामगारांकडे सुपूर्द करावा. तुये पंचायत क्षेत्रात जास्त करून औद्योगिक वसाहतीमध्ये मोठ्या प्रमाणात बिगर गोमंतकीय भाडेकरू राहतात. त्या ठिकाणी मोठ्या प्रमाणात कचऱ्याची समस्या निर्माण होते, असे कांदोळकर म्हणाले.