Goa Naibag Old Highway Truck Accident News

पेडणे: न्हयबाग येथे जुन्या महामार्गावर पडलेल्या मोठमोठ्या खड्ड्यांमुळे रविवारी उत्तररात्री २ वाजता पेपर रोल घेऊन पुण्याला जाणाऱ्या एका ट्रकचा हौदा तुटून रस्त्यावर पडला. सुदैवाने यावेळी मागे दुसरे वाहन नसल्यामुळे मोठा अनर्थ टळला.

सविस्तर माहितीनुसार, एमएच ५०-एन ६४८९ या क्रमांकाचा ट्रक कुंडई येथील औद्योगिक वसाहतीतून पेपर रोल घेऊन पुण्याला जात होता. मालपे येथे राष्ट्रीय महामार्ग ८८ वर पडलेली दरड अद्याप हटविण्याचे काम पूर्ण न झाल्याने पूर्वीच्या जुन्या मार्गावरुन वाहतूक वळविण्यात आली आहे. पण या जुन्या महामार्गाला अनेक ठिकाणी मोठमोठे खड्डे पडले असून रस्ता पूर्णपणे उखडून गेला आहे.

हा ट्रक न्हयबाग येथील जुन्या राष्ट्रीय महामार्गाच्या उतरणीवर (ढाब्याजवळ) पोचला असता खड्ड्यामुळे बसणाऱ्या हादऱ्यांमुळे ट्रकचा हौदा निखळून महामार्गावर पडला. सुदैवाने यावेळी या ट्रकच्या मागे किंवा बाजूने दुसरे वाहन नसल्याने अनर्थ टळला. या प्रकरणी पेडणे पोलिस निरीक्षक सचिन लोकरे यांच्या मार्गदर्शनाखाली सहाय्यक उपनिरीक्षक आनंद परब यांनी अपघाताचा पंचनामा केला. पुढील तपास सुरू आहे.