डिचोली : डांबरमिश्रित खडीवाहू ट्रकने सेसा (वेदांता) कंपनीच्या रुग्णवाहिकेला धडक दिल्याने अपघात झाला आहे. ही घटना आज शुक्रवारी सकाळी कारापूर-तिस्क परिसरात घडली आहे. सुदैवाने या अपघातात रुग्णवाहिकेची काही प्रमाणात नुकसान वगळता अन्य कोणताही अनर्थ घडला नाही.

या अपघातामुळे साखळी-डिचोली रस्त्यावरील वाहतुकीचा काहीवेळ खोळंबा झाला. अपघात घडला त्याठिकाणी हॉटमिक्स डांबरीकरणाचे काम चालू होते. अपघातामुळे हे कामही काहीवेळ खोळंबले होते.
जीए-04-टी-4067 या क्रमांकाची सेसा (वेदांता) कंपनीची रुग्णवाहिका साखळीच्या दिशेने जात होती. कारापूर येथील शर्वराज फार्मजवळ पोचताच त्याठिकाणी मागे घेत असता जीए-04-टी-1828 डांबरमिश्रित खडीवाहू ट्रकची रुग्णवाहिकेला मागच्या बाजूने धडक बसली.

अपघातग्रस्त ट्रक त्याठिकाणी चालू असलेल्या हॉटमिक्स डांबरीकरणासाठी खनिजमिश्रित डांबर घेऊन आला होता. पोलिस घटनास्थळी दाखल झाल्यानंतर या रस्त्यावरील वाहतूक सुरळीत झाली. हे प्रकरण नंतर आपापसात सामोपचाराने मिटवण्यात आले. मात्र अपघातामुळे साखळी-डिचोली मार्गावर प्रवास करणाऱ्यांचा काहीवेळ खोळंबा झाला. अपघातात वाहनांचं किरकोळ नुकसान झाल्याची माहिती आहे.