कळंगुट: सोमवारी रात्री पडलेल्या अवकाळी पावसामुळे कळंगुट तसेच शिवोली पंचक्रोशीतील लोकांची त्रेधातिरपीट उडाली. या परिसरातील झाडे तसेच झाडांच्या फांद्या घरांवर तसेच पार्क केलेल्या वाहनांवर कोसळून अनेकांचे नुकसान झाले. त्यातच रात्री दहाच्या सुमारास गुल झालेली वीज मध्यरात्रीपर्यंत न आल्याने लोकांची उकाड्यामुळे बरीच घालमेल झाली. कळंगुटमधील नाईकवाडा तसेच परिसरात वादळी वाऱ्याने झाडांच्या फांद्या रस्त्यावर कोसळल्याने रात्री दोन तास या भागातील वाहतूक ठप्प झाली. पिळर्ण अग्निशमन दलाच्या जवानांनी तात्काळ धाव घेत रस्त्यावरील झाडे तसेच फांद्या हटविल्या. मंगळवारी वीजपुरवठा सुरळीत झाला.