वास्को: गोव्यातील सोळा बसस्थानके जागतिक दर्जाची बांधण्यात येणार आहेत. पहिल्या टप्प्यात वास्को, पणजी, मडगाव, म्हापसा या बसस्थानकांचा समावेश असणार आहे. अशी माहिती वाहतूक मंत्री माविन गुदिन्हो यांनी दिली आहे. कदंब बसस्थानक रस्ता डांबरीकरण शुभारंभ प्रसंगी ते बोलत होते.

(Transport minister mauvin godinho claims goa to have 16 world calls bus stand)

पुढे बोलताना गुदिन्हो म्हणाले, कदंब महामंडळाला आणखी 200 इलेक्ट्रिक बसगाड्या मिळणार आहेत. यासाठी केंद्र सरकार राज्य सरकारला पुरेपूर मदत करीत आहे. येणाऱ्या काही महिन्यांमध्ये या ठिकाणी जागतिक बसस्थानक पाहण्यास मिळणार आहेत. दाजी व आपण मिळून वास्कोचा विकास करणार आहोत. असे ही ते म्हणाले.

यावेळी वास्कोचे आमदार कृष्णा साळकर म्हणाले, या रस्त्यामुळे लोकांची समस्या दूर होण्यास मदत होणार आहे. पालकमंत्री या नात्याने गुदिन्हो यांच्याकडे जेव्हा विकासकामांचा प्रश्न घेऊन गेलो, तेव्हा ती कामे झाल्याचे त्यांनी स्पष्ट केले.

केंद्रीय मंत्री गडकरी यांनी हे बसस्थानक जागतिक दर्जाचे बांधण्याचे ठरविले आहे. त्यामुळे नागरीकांना आणखी एक दोन वर्षे थोडा त्रास सहन करावा लागेल. या बसस्थानकाचे बांधकाम मार्गी लागेपर्यंत तेथे इतर सुविधा उपलब्ध केल्या जातील. असे ते म्हणाले.

या कार्यक्रमास आमदार दाजी साळकर, नगराध्यक्ष लिओ रॉड्रिग्ज,उपनगराध्यक्ष अमेय चोपडेकर, नगरसेविका शमी साळकर, विनोद किनळेकर, गिरिष बोरकर, माजी नगराध्यक्ष नंदादीप राऊत आदी मान्यवर उपस्थित होते.