केपे: शिवनगर-धावडशेत येथे भाड्याच्या खोलीत राहणाऱ्या दोन लहान मुलांचा कालव्यात पडल्याने बुडून करूण अंत झाला.

प्राप्त माहितीनुसार, शिवनगर-धावडशेत येथे काही भाड्याच्या खोल्यांमध्ये भाडेकरू राहात असून त्या खोल्यांच्या शेजारीच शेतीसाठी पाणीपुरवठा करणारा पाण्याचा छोटा कालवा आहे. आज दुपारी १२.३० वाजण्याच्या सुमारास दोन लहान मुले कालव्याच्या दिशेने गेली.

त्या दोघांचाही पाय घसरून ते कालव्यात पडले. ते दोघेही पाण्यातून वाहत साधारण दोन किलोमीटर बेतमोद्दी येथे जाऊन लाकडामध्ये अडकले.

लोकांच्या दृष्टीस लहान मुलांचे मृतदेह दृष्टीस पडल्याने एकच गोंधळ उडाला. नंतर लोकांनी त्वरित याची माहिती कुडचडे पोलिसांना दिली असता पोलिसांनी घटनास्थळी जाऊन पंचनामा केला.

रेहान सादिक श्रीट्टी (वय १५ महिने) आणि वाहीद अश्पाक हाश्मी (वय १८ महिने) अशी या चिमुरड्यांची नावे आहेत. ही दोन्ही मुले शिवनगर-धावडशेत येथील समजल्यानंतर त्यांच्या कुटुंबीयांना याची माहिती देण्यात आली.