Ponda Road Problem: सध्या एकीकडे फोंडा शहरात रस्त्याच्या हॉटमिक्सिंगचे काम सुरू असले तरी चर खोदण्याचे सत्र मात्र थांबलेले दिसत नाही.त्यामुळे एकीकडे डांबरीकरण तर दुसरीकडे खोदकामे अशी सध्या फोंड्याचे चित्र दिसत आहे. वारंवार चरी खोदल्या जात असल्याने शहरासह परिसरातही धूळ प्रदूषण वाढत आहे. सध्या फोंडावासीय खोकला, ताप तसेच श्‍वसनाच्या विकारांनी त्रस्त असून खोदकाम कधी संपणार, हा प्रश्‍न सर्वांना सतावत आहे.

आधीच शहरातील वाहतूक बेफाम झाली असून मुख्य रस्त्यावरच चर खोदल्यामुळे वाहने कशी हाकावीत, हाही प्रश्‍न विचारला जाऊ लागला आहे. यामुळे सकाळ-संध्याकाळी वाहतूक कोंडी नित्याचीच झाली आहे. याला खरेतर नियोजनाचा अभाव हेच प्रमुख कारण असून डांबरीकरण सुरू असताना चर कसे काय खोदले जातात, असे नागरिकांना वाटू लागले आहे.

मुख्य म्हणजे ही खोदकामे पावसाळ्यापर्यंत तरी संपणार, का हेही कळेनासे झाले आहे. पावसाळ्यात कामे बंद व पावसाळा संपल्यानंतर नोव्हेंबरपासून पुन्हा खोदकामे सुरू, असे सत्र गेली कित्येक वर्षे सुरू आहे.

कधी वीजवाहिन्या, तर कधी दूर संचारच्या केबल्स घालण्याकरिता किंवा गॅस वाहिनी तसेच मलनिस्सारणच्या प्रकल्पाकरिता हे खड्डे खोदले जात आहेत.

याबाबतीत कृषिमंत्री तथा फोंड्याचे आमदार रवी नाईक यांनी हॉटमिक्सिंग झाल्यावर खड्डे खोदण्याची कामे बंद होतील, असे आश्‍वासन दिले होते. पण वारखंडे येथील मुख्य रस्त्याचे हॉटमिक्सिंग जवळजवळ पूर्ण झाले असूनही खोदकामे संपलेली नाहीत.

ही खोदकामे वाहनचालकांच्या जीवाशी खेळणारी असून रात्री हे खोदलेले खड्डे दिसत नसल्यामुळे अनेक अपघात झाले आहेत. सध्या उत्तर नसलेला हा प्रश्‍न बनला असून संबंधितानी हा प्रश्‍न एकदा संपवावा, अशी मागणी फोंडा व आसपासच्या परिसरातील नागरिकांकडून होत आहे. वाहतूक कोंडीमुळे त्रस्त वाहनचालकांनीही काम संपवण्याची मागणी केली आहे.