Mapusa News : म्हापसा येथील मार्केटमधील दुकानांच्या भाडेवाढी विरोधात म्हापसा व्यापाऱ्यांनी आक्रमक पवित्रा घेतला असून, गुरुवारी (ता.१८) सकाळी व्यापारी वर्गाने आपली दुकाने बंद ठेवत पालिकेवर धडक मोर्चा काढला.

सुमारे अडीज तास पालिकेत ठिय्या मांडून बसल्यानंतर स्थानिक आमदारांनी आपण याप्रकरणात आवश्यक लक्ष घालून तोडगा काढण्याचे आश्वासन दिल्यानंतर व्यापारी माघारी परतले.

दरम्यान, पालिकेकडून येत्या काही दिवसांत ठोस पाऊल न उचलल्यास, मार्केट बंदचा पर्याय अद्याप खुलाच आहे, असा इशारा व्यापाऱ्यांनी पालिकेतून निघताना दिला.

यावेळी कायदा-सुव्यवस्थेचा प्रश्न निर्माण होऊ नये म्हणून म्हापसा पोलिस निरीक्षक हे फौजफाट्यासह घटनास्थळी उपस्थित होते.

दुप्पट दरवाढीला आक्षेप

नुकताच झालेल्या म्हापसा पालिका मंडळाच्या बैठकीत पालिकेच्या स्थावर मालमत्ता असलेल्या बाजारपेठेतील दुकानांच्या भाडेपट्टीत साबांखाच्या दरानुसार वाढ करण्याचा ठराव घेण्यात आलेला.

त्यानुसार, हा नवीन दर १५२ रुपयांवरुन २९६ रुपये प्रती चौरस मीटर करण्यात आला. या दुप्पट दरवाढीला व्यापाऱ्यांचा तीव्र आक्षेप आहे.