दाबोळी : खाण अवलंबतांचे प्रश्न मांडणारे पुती गावकर यांना स्थानिक प्रश्नांची जाण आहे. अशा नेत्यांची ‘आप’ला गरज आहे. राज्यातील स्थानिकांचे प्रश्न सोडविण्यासाठी आप पुढाकार घेणार असून, पुती गावकर यांच्यासारखे नेते पुढे यायला हवेत. साखळी मतदारसंघातून त्यांना लढण्याची इच्छा असेल तर ते मुख्यमंत्र्यांविरुद्ध लढतील, असे आपचे सर्वेसर्वा अरविंद केजरीवाल यांनी केले.

गोवा मायनिंग पिपल फ्रन्टचे (जीएमपीएफ) समन्वयक पुती गावकर यांनी आज ‘आप’ पक्षात प्रवेश केला. यावेळी अरविंद केजरीवाल यांनी जणू मुख्यमंत्री प्रमोद सावंत यांच्याविरुद्ध आपचा नेता जाहीर केला. गावकर यांनी साखळी मतदार संघातून लढण्याची तयारी दाखविली तर आम्ही त्यांना पूर्ण सहकार्य करू तसेच इतर स्थानिक नेत्यांनीही पुती गावकर यांना सहकार्य करावे, असे आवाहनही केजरीवाल यांनी केले. आपल्याला प्रामाणिक पक्ष म्हणून ‘आप’ हाच दिसल्याने मी या पक्षाची निवड केली, असे पुती म्हणाले.

खाण व्यवसाय सुरू करू

राज्यात खाणींचा प्रश्न एरणीवर आहे. या व्यवसायावर अवंलबून असणाऱ्यांचे रोजगार गेले आहेत. अनेकांचे संसार संकटात सापडले आहेत. गोव्यात ‘आप’चे सरकार आल्यास आम्ही अवघ्या सहा महिन्यात खाण व्यवसाय सुरू करणार आहो, असे केजरीवाल म्हणाले.

भंडारी समाजाचा पाठींबा

राज्यात भंडारी समाजाचे मतदार अधिक आहेत. त्यानुसार जो पक्ष भंडारी समाजाच्या नेत्यांना सर्वाधिक उमेदवारी देईल, त्या पक्षाला समाजाचा पाठिंबा राहील आणि तशी भूमिका भंडारी समाजाने घेतली होती. त्यांनी आपचे अरविंद केजरीवाल यांना तसे कळविलेही होते. त्यानुसार, अरविंद केजरीवाल यांनी भंडारी समाजाच्या नेत्यांची भेट घेतली. केजरीवाल यांनी दिल्लीत उत्कृष्ट कार्य केले असून, त्यांनी सर्वसामान्य जनतेचे अत्यंत प्रामाणिकपणे प्रश्न सोडविले आहेत, असे समाजाचे अध्यक्ष अशोक नाईक म्हणाले.

दाबोळी विमानतळावर घोषणाबाजी

आपचे राष्ट्रीय संयोजक अरविंद केजरीवाल यांचे गोव्यात दाबोळी विमानतळावर दुपारी दीड वाजता आगमन झाले. यावेळी त्यांच्या स्वागतासाठी ‘आप’चे महादेव नाईक, प्रेमानंद नानोस्कर, राहुल म्हांब्रे, प्रतिमा कुतिन्हो, संदेश तेलेकर, सीसील रॉड्रिगीस व इतर पदाधिकारी व समर्थक कार्यकर्ते मोठ्या संख्येने उपस्थित होते. दाबोळी विमानतळावरून केजरीवाल बाहेर येताच ‘केजरीवाल तुम आगे बढो, हम तुम्हारे साथ है, आमका जाय, आमका जाय केजरीवाल आमका जाय’ अशा घोषणा देण्यात आल्या.