डिचोली: जागतिक पर्यटन स्थळ असलेला परंतु पर्यटकांचा "कर्दनकाळ" ठरत असलेल्या हरवळे धबधब्याने सोमवारी (ता.23) आणखी एका पर्यटक युवकाचा (Tourist youth) बळी घेतला आहे. आंघोळीची मजा लुटताना दिल्ली येथील हर्ष राजेश कुमार (Harsh Rajesh Kumar) या 21 वर्षीय युवकाचा धबधब्यात बुडून मृत्यू झाला.

ही घटना सायंकाळी 6 वाजण्याच्या सुमारास घडली. धबधब्यात बुडून मृत्यू पावलेला विद्यार्थी यंदाच बारावीची परीक्षा उत्तीर्ण झाला होता. अशी माहिती मिळाली आहे. दरम्यान, या घटनेची माहिती मिळताच डिचोली अग्निशमन दलाच्या जवानांनी घटनास्थळी धाव घेतली. दलाचे अधिकारी श्रीपाद गावस आणि लिडिंग फायर फायटर बी. ए. गावस यांच्या नेतृत्वाखाली दलाच्या जवानांनी तातडीने शोधमोहीम हाती घेतली. तासाभराच्या शोध मोहिमेनंतर सायंकाळी उशिरा साधारण 7.30 वाजण्याच्या सुमारास दुर्दैवी हर्ष याचा मृतदेह आढळून आला. पोलिसांनी पंचनामा करून मृतदेह उत्तरीय तपासणीसाठी बांबोळी येथे पाठविला आहे.

मिळालेल्या माहितीनुसार दिल्ली येथील चार युवकांचा गट पावसाळी पर्यटनाची मजा लुटण्यासाठी सोमवारी सायंकाळी हरवळे धबधब्यावर आले होते. चौघेही आंघोळीसाठी खोल पाण्यात उतरले असता, हर्ष हा विद्यार्थी बुडाला. हर्ष याच्या रूपाने चालू महिन्यातील हरवळे धबधब्यावरील दुसरा बळी ठरला आहे. गेल्या 1 ऑगस्ट रोजी मूळ पंजाब येथील नवज्योत सिंग या 22 वर्षीय युवकाचा धबधब्यावर बुडून बळी गेला होता.