मुंबई गोवा महामार्गावर आज बुधवारी सकाळी हिट अँड रनची घटना घडली आहे. कोलवाळ येथील चिखली जंक्शनवर राष्ट्रीय महामार्ग 66 वर रस्ता क्रॉसिंग करताना एका भरधाव प्रवासी बसने धडक दिल्याने एका पादचाऱ्याचा मृत्यू झाला. लक्ष्मण फडते ( 66, रेवोडा) असे मयताचे नाव आहे.

उपलब्ध माहितीनुसार, हा अपघात बुधवार सकाळी 8.30 वाजण्याच्या सुमारास झाला. मुंबई ते गोवा मार्गावर धावणार्‍या एका खासगी प्रवासी बसने पादचार्‍याला धडक दिल्याने त्याचा जागीच मृत्यू झाला. ही बस ही मुंबईवरून प्रवाशांना घेऊन आली होती आणि ती म्हापशाच्या दिशेने जात होती. या अपघातानंतर बससह पळ काढणार्‍या बसचालकास नंतर म्हापसा पोलिसांनी म्हापशातून ताब्यात घेत त्याला रितसर अटक केली.

दुसरीकडे कोलवाळमधील अग्नितांडवही आज चर्चेचा विषय ठरलं. मुशीरवाडा-कोलवाळ परिसरातील बेकायदा भंगार अड्ड्यांना भीषण आग लागल्याने संपूर्ण चारही भंगार अड्डे जळून खाक झाले. एका भंगारअड्ड्यामध्ये कामगार वेल्डिंगचे काम करीत असताना त्याची ठिणगी पडून सदर आग लागल्याचे सांगितले जात आहे.

काही वेळात या आगीने रौद्ररुप धारण केले. अग्निशमन दलास याची माहिती मिळताच तातडीने गाड्या घटनास्थळी रवाना करण्यात आल्या. जवानांकडून या आगीवर नियंत्रण मिळवण्याचे शर्थीचे प्रयत्न सुरु होते. मात्र, या आगीची भीषणता इतकी तीव्र होती की परिसरात तसेच आकाशात आगीमुळे धुराचे लोट पाहायला मिळाले.

या आगीत एक कामगार गंभीर जखमी झाला असून त्यास म्हापसा येथील जिल्हा रुग्णालयात दाखल करण्यात आले, मात्र त्यानंतर पुढील उपचारासाठी त्यास गोमेकॉत हलवण्यात आले. तो जवळपास 70 टक्के भाजल्याचे सूत्रांनी सांगितले. यासिन शेख (56) असं या जखमीचे नाव आहे. ही आगीची घटना बुधवारी सकाळी 10.30 च्या सुमारास घडली. या आगीवर दुपारपर्यंत नियंत्रण मिळवता आले नव्हते. आगीमुळे कोट्यवधींचे नुकसान झाल्याचा प्राथमिक अंदाज वर्तविला जात होता. या चारही भंगारअड्ड्यात निरुपयोगी टाकाऊ वस्तू होत्या. ज्यामध्ये मोठ्या प्रमाणावर टायर, ट्युब, खराब 100 एसीचे संच, बॅरल, फायबर, पुठ्ठे, रसायनं, वीजवाहिन्यांच्या तारा आदी सामान या आगीत जळून भस्मसात झाले.

या भंगारअड्ड्यांना लागूनच काही घरे आहेत. या आगीची झळ या घरांना पोहचू नये यासाठी अग्निशमन दल आणि पोलिसांकडून शर्तीचे प्रयत्न सुरु होते. याशिवाय घरातील सर्वांना सुखरुप बाहेर काढण्यात आले, जेणेकरुन कुठलीही अप्रिय घटना घडू नये. दुपारनंतर दोन जेसीबी बोलवण्यात आली. या जेसीबीच्या सहाय्याने भंगार अड्ड्यामधील सामान हे विखूरण्याचा प्रयत्न केला जात होता, जेणेकरुन ही आग आणखी पसरु नये. या भंगारअड्ड्यास लागून एक हेअर कटिंग सलून तसेच किराणाचे दुकान होते. त्यातील सामान सुद्धा हटविण्यात आले.