पणजी : टोमॅटोच्या दराने ग्राहकांच्या उरात धडकी भरत आहे. गेल्या काही दिवसांपासून टॉमेटोने गाठलेली दराची शंभरी अजूनही तशीच आहे. वाढलेल्या टोमॅटो दराने अनेकांच्या तोंडचे पाणी पळविले आहे. (Tomato rates are soaring in Goa)

अवकाळी पडलेल्या पावसामुळे तसेच उत्पन्न घटल्याने टोमॅटोचा बाजारात तुटवडा जाणवू लागला परिणामी दरात वाढ झाली. आठवडाभरापूर्वी 30 रुपये किलो रुपये दराने मिळणारे टॉमेटो आता 100 रुपयांनी मिळू लागला आहे. तर फलोत्पादन महामंडळाच्या पणजी येथील गाळ्यात 45 रूपये प्रती किलो दराने टोमॅटो उपलब्ध आहेत. कांदा व बाटाट्याचे दर मात्र स्थिर आहेत. गवार बिन्स, शिमला मिरची यांचे दर चढेच आहेत.

पिकलेले गरे 100 रुपयांना वाटा

रानमेव्यानंतर आता पिकलेले पिवळेबुंद खमंग गरे पणजी बाजारात उपलब्ध झाले आहेत. 100 रुपये प्रती वाटा दराने विकले जात असून अनेक शौकीन ते आवर्जून घेत आहेत. रानमेव्यातील जांभळे आणि करवंदे अजूनही बाजारात उपलब्ध आहेत. अनेक रानमेवाप्रेमी ते विकत घेताना दिसतात. मानकुराद आंब्याची आवक कमी झाल्याने 500 रुपये प्रती डझन दराने विकला जात आहे.