थिवी: येथील ग्रामसभा मैदानाच्या कामावरून बरीच वादळी ठरली. मैदानाचे काम पूर्ण न होताच कंत्राटदाराला कामाचे पैसे फेडल्याने ग्रामस्थ रॉबर्ट कुलासो यांनी सरपंचांना घेरण्याचा प्रयत्न केला. ५३ लाख देण्यापूर्वी मैदान देखभाल समितीला विश्वासात का घेतले नाही असाही प्रश्न त्यांनी केला. दरम्यान, लवकरात लवकर मैदान देखरेख समिती, कंत्राटदार व बांधकाम विभागाच्या अधिकाऱ्यांची एक संयुक्त बैठक बोलवावी असा ठराव घेण्यात आला.

या सभेला सरपंच व्यंकटेश शिरोडकर, उपसरपंच हर्षता कळंगुटकार, पंच शिवदास कांबळी, मायकल फर्नांडिस, गीता शेळके, तुळशीदास शिंदे, प्रीती आरोलकर, सुनीता साळगावकर, समीक्षा मयेकर, सचिव गोविंद खलप व निरीक्षक विद्याधर साळगावकर उपस्थित होते.

माडेल थिवी येथील बस थांब्यावर सकाळी ८ ते ९ वाजेपर्यंत परप्रांतीय कामगारांचे जत्थे उभे असतात. त्यामुळे गावातील महिलांना बस थांब्यावर बसच्या प्रतीक्षेत थांबणे असुरक्षित वाटते. गेल्या ग्रामसभेत हा विषय मांडला होता, त्याचे पुढे काय झाले असा प्रश्न नीलेश साळगावकर यांनी केला. यावर पंचायतीने पोलिसांना पत्र लिहून कळविल्याचे सरपंचानी सांगितले. परंतु अजून त्या ठिकाणी कोणतीच कारवाई झाल्याचे येत नाही.

त्यामुळे पोलिस निरीक्षकांना भेटून हा प्रश्‍न सोडवावा अशी मागणी यावेळी केली. पंचायत क्षेत्रात यापुढे मोठ्या बांधकाम प्रकल्पांना मंजुरी देण्यापूर्वी त्यांनी दाखविलेल्या रस्त्याची रुंदी तपासून पाहावी व त्यानंतरच मंजुरी द्यावी, अशी सूचना करण्यात आली.