काणकोण: काणकोण तालुक्यातील शैक्षणिक संस्थांच्या शंभर मीटर परिघात मद्यालयांची संख्या किती आहे, याचा अहवाल अबकारी कार्यालयाने सर्वेक्षण करून काणकोणच्या जिल्हाधिकाऱ्यांना सादर केला. जिल्हाधिकाऱ्यांनी कार्यालयाला निर्देश देऊन अहवाल सादर करण्याची सूचना केली होती, असे अबकारी खात्याचे निरीक्षक शेखर देसाई यांनी सांगितले. काणकोणात अशी एकवीस मद्यालये असल्याची माहिती मिळाली आहे.

काणकोणात काही मद्यालयांना 1958 मध्ये परवाना देण्यात आला होता. मात्र, त्यानंतर काही ठिकाणी शैक्षणिक संस्था उभ्या राहिल्या. प्राप्त माहितीनुसार आगोंद किनारी भाग, पैंगीण बाजार, माशे, भाटपाल, पाळोळे या भागांत शैक्षणिक संस्थांजवळ मद्यालये आहेत. त्यामुळे या मद्यालयांवर कारवाई झाल्यास त्यांना शंभर मीटर परिघ क्षेत्राबाहेर स्थलांतर करावे लागणार आहे. शाळांजवळ मद्यालये असल्यामुळे काणकोणमधील विद्यार्थ्यांचे पालक चिंतेत आहेत.