Theft in Margao Municipal Council: गोव्यात चोरी होण्याच्या घटनांमध्येच अशी एक घटना समोर आली आहे ज्यामुळे सगळ्यांच्याच भुवया उंचावल्या आहेत. मडगाव नगरपालिकेच्या करवसुली ड्रॉवरमधून सोमवारी दिवसाढवळ्या 50 हजारांची रोकड गायब झाल्याचा धक्कादायक प्रकार उघडकीस आला आहे.

या घटनेबाबत मडगाव पालिकेने पोलिसात तक्रार दिली आहे. वरिष्ठ अधिकारी अभय राणे म्हणाले की ड्रॉवरमध्ये ठेवलेले सोपो कलेक्शन गायब झाल्यामुळे सर्वचजण आश्चर्यचकित झाले आहेत. याबाबत सीसीटीव्ही तपासले आहेत. पण संबंधित सीसीटीव्ही कॅमेरा काम करत नसल्याचे स्पष्ट झाले.

याबाबत माजी अध्यक्षा पूजा नाईक यांनी नाराजी व्यक्त केली आहे. त्या म्हणाल्या की, कर आकारणीच्या व्यस्त विभागातून 50 हजार कर दिवसाढवळ्या चोरी होतो ही अतिशय लाजिरवाणी आणि धक्कादायक बाब आहे. याची उच्चस्तरीय चौकशी होऊन चोराला लवकरात लवकर पकडण्यात यावे.

अभय राणे यांनी दिलेल्या माहितीनुसार, जेव्हा हा प्रकार उघडकीस आला त्यानंतर संबंधित सीसीटीव्ही तपासण्यात आले. पण तो बंद असल्याचे समजले. पण दुसऱ्या सीसीटीव्हीमधून एक संशयित व्यक्ती दिसल्यामुळे चौकशीला एक दिशा मिळू शकते, मात्र याबाबत अद्याप खात्री नसल्याने त्याला पकडण्यात आले नाही. पोलीस या चोराचा शोध घेत आहेत.