Theft in Chandreshwar Bhootnath Temple Goa: गेल्या रविवारी केपे बाजारात प्रवासी बसमध्ये चढताना दोन महिलांच्या सोनसाखळ्या चोरून नेल्या होत्या. हे प्रकरण ताजे असतानाच आज, सोमवारी आणखी चोरी उघडकीस आली आहे.

काल रात्री पर्वत परोडा येथील श्री चंद्रेश्वर भूतनाथ संस्थानातील फंड पेटी फोडून त्यातील सुमारे दहा हजार रुपयांची रोकड अज्ञातांनी चोरून नेली.

केपे पोलिसांनी दिलेल्या माहितीनुसार काल रात्री १२.३० ते २.३० च्या दरम्यान चोरी झाली असून मंदिराचा दरवाजा फोडून दोघा चोरट्यांनी मंदिरात प्रवेश केला. त्यांनी फंड पेटी फोडून त्यातील रक्कम घेऊन पेटी मंदिराच्या पाठीमागील बाजूस टाकली.

आज सकाळी मंदिरातील बाहेरचे दिवे बंद करण्यासाठी आले असता चोरीचा प्रकार उघडकीस आला. तत्काळ पोलिसांना हा प्रकार कळविण्यात आला. दरम्यान, मंदिराच्या सीसीटीव्हीमध्ये चोरटे कैद झाले आहेत.

मंदिराचे मुख्यत्यार पंडित देसाई यांनी पोलिसांना दिलेल्या माहितीप्रमाणे दोन आठवड्यापूर्वी ही फंड पेटी उघडून आतील पैसे काढले होते. सध्या त्या पेटीत दोन आठवड्याचे पैसे होते.

दरम्यान, मंदिरच्या सुरक्षेसाठी दोन सुरक्षा रक्षकांची नेमणूक करण्यात आली असून ते काल रात्री कामावर आले नव्हते. चोरीचा शोध घेण्यासाठी श्वान पथक तसेच ठसे तज्ज्ञांना घटनास्थळी दाखल केले होते. केपे पोलिसांनी चोरीचा पंचनामा केला असून पुढील तपास सुरू आहे.