Ganesh Chaturthi: गणेश चतुर्थी हा गोमंतकीयांचा सर्वांत मोठा सण तोंडावर आला असताना पावसाने पुन्‍हा हजेरी लावल्‍याने विक्रेत्‍यांमध्‍ये चिंतेचे वातावरण पसरले आहे. आज बुधवारी पावसाने कहर केल्यामुळे डिचोलीतील आठवडी बाजारावर बराच परिणाम जाणवला. विशेष म्‍हणजे आजचा आठवडी बाजार हा चतुर्थीपूर्वीचा शेवटचा बाजार होता. मात्र पावसामुळे तो थंडावला.

डिचोली (Bicholim) बाजारातील काही विक्रेत्यांना पावसामुळे आपापले साहित्‍य बंद करून ठेवावे लागले आणि बहुतांश ग्राहकांनीही बाजाराकडे पाठ फिरवली. त्यामुळे आजच्या बाजारातील उलाढालीवर मोठा परिणाम झाला.सकाळी जोरदार पाऊस बरसल्यानंतर आठवडी बाजारात व्यवसाय करणाऱ्या बहुतेक विक्रेत्यांना आपले साहित्‍य झाकून ठेवावे लागले.

दुपारी साधारण तासभर पावसाने विसावा घेतला खरा, मात्र नंतर पुन्हा साधारण दीड वाजता अर्धा तास जोरदार पर्जन्यवृष्टी झाली. सायंकाळपर्यंत पावसाळी वातावरण राहिल्याने डिचोली बाजारावर मोठापरिणाम जाणवला.

ग्राहकांनी फिरविली बाजाराकडे पाठ

चतुर्थीपूर्वीचा शेवटचा आठवडी बाजार असल्याने आज बाजारात गर्दी उसळण्याची शक्यता होती. मात्र पावसामुळे बहुतांश नियमित ग्राहक बाजाराकडे फिरकलेच नाहीत. दुपारी आणि सायंकाळी भाजी बाजारात किंचित वर्दळ दिसून आली. बहुतांश विक्रेते ग्राहकांच्या प्रतीक्षेत होते. पावसामुळे ग्राहकांची संख्या रोडावली. सायंकाळी भाजी मार्केटमध्‍ये काहीसी गर्दी जाणवली. पावसामुळे अपेक्षेप्रमाणे व्‍यवसाय झालाच नाही. व्यवसायावर बराच परिणाम झाला, असे अजित परब या दुकानदाराने सांगितले.