Tribals Political Reservation: आदिवासीच्या राजकीय आरक्षणाचा प्रश्र्न मुख्यमंत्री डॉ. प्रमोद सावंत यानी पंतप्रधान नरेंद्र मोदी यांच्याकडे मांडावा, अशी मागणी द युनायटेड ट्रायबल असोसिएशन अलायन्स (उटा) चे अध्यक्ष प्रकाश वेळीप यांनी केली आहे.

सध्या आदिवासीच्या वेगवेगळ्या समस्या संदर्भात माहिती मिळविण्यासाठी उटाच्या वेगवेगळ्या तालुक्यांमध्ये बैठका सुरु असून सासष्टीतील बैठकीच्या वेळी वेळीप यांनी वरील मागणी केली. यावेळी नरेंद्र मोदी तिसऱ्यांदा पंतप्रधान होण्याचा मान मिळल्याबद्दल त्यांचे अभिनंदन करण्यात आले. पंतप्रधान मोदी यांच्या नेतृत्वाखालील केंद्र सरकारच आदिवासीच्या राजकीय आरक्षणाचा प्रश्र्न सोडवू शकते, असा विश्र्वास वेळीप यांनी व्यक्त केला.

केंद्रात भाजपचे सरकार आल्यावर संसदेत या संदर्भात विधेयक मांडले जाईल, असे गत केंद्रीय मंत्र्यांच्या बैठकीत निर्णय घेण्यात आला होता. मोदी तिसऱ्यांदा पंतप्रधान झाल्याने मुख्यमंत्री डॉ. प्रमोद सावंत यांनी आदिवासीची राजकीय आरक्षणाबद्दलची मागणी केंद्राकडे मांडावी. सासष्टीतील या बैठकीत सरकारी योजना सर्व आदिवासी समाजापर्यंत पोहोचतात की काय? या बद्दलचा आढावा घेण्यात आला, असेही वेळीप यांनी सांगितले. या बैठकीला कला व संस्कृती तथा क्रीडा मंत्री गोविंद गावडे व उटाचे अन्य पदाधिकारी उपस्थित होते.