Goa Teacher: काऱ्यामड्डी-कुडचडे येथे इमारतीच्या चौथ्या मजल्यावरून उडी मारून अनिता फर्नांडिस (५४) या शिक्षिकेने जीवन संपवल्याची दुर्दैवी घटना मंगळवारी (ता.२८) सकाळी 6 वाजता घडली. कुडचडे पोलिसांनी दिलेल्या माहितीनुसार, अनिता फर्नांडिस या मूळ सांगे येथील रहिवासी असून त्या पती व मुलीसह काऱ्यामड्डी-कुडचडे येथे फ्लॅटमध्ये राहात होत्या.

सकाळी 6 वाजता अनिता यांनी फ्लॅटचा मुख्य दरवाजाला बाहेरून कडी लावली आणि इमारतीच्या वरच्या मजल्यावर जाऊन खाली उडी मारली. इमारतीवरून उडी मारल्याने अनिता जमिनीवर रक्ताच्या थारोळ्यात पडल्या होत्या. ते पाहून लोकांना प्रचंड धक्का बसला. त्यांना कुडचडे आरोग्य केंद्रात दाखल केले असता, डॉक्टरांनी त्यांना मृत घोषित केले.

आत्महत्येचे कारण समजू शकले नाही.

कुडचडे पोलिसांनी पंचनामा करून मृतदेह उत्तरीय तपासणीसाठी मडगाव येथे जिल्हा हॉस्पिटलमध्ये पाठविला असून कुडचडे पोलिस पुढील तपास करत आहेत.

मुलगीही शिक्षिका

अनिता या उगे-सांगे येथे प्राथमिक विद्यालयात शिक्षिका होत्या, तसेच त्यांची मुलगीही शिक्षिका असल्याची माहिती सूत्रांनी दिली. अनिता यांनी उचललेल्या या टोकाच्या पावलाबद्दल परिसरातील लोकांना प्रचंड धक्का बसला आहे. या घटनेची कुडचडेत दिवसभर चर्चा सुरू होती.

वैद्यकीय उपचार होते सुरू

अनिता फर्नांडिस यांच्यावर वैद्यकीय उपचार सुरू होते. त्यांची मानसिक स्थिती ठीक नव्हती. त्यांना रात्री झोपही लागत नव्हती. अनिता यांनी आजाराला कंटाळून आत्महत्या केल्याचे बोलले जात आहे.