Old Goa Road: सांतान – जुने गोवा रस्त्यावरील संरक्षण भिंत जुलै 2023 मध्ये कोसळली होती, तेव्हा पासून हा रस्ता चार चाकी वाहनांसाठी बंद होता. रविवारी सांतानवासीयांनी रस्त्याचे काम पुन्हा कधी सुरू होईल, यासंदर्भात सार्वजनिक बांधकाम खात्याला सात दिवसांची मुदत दिल्यानंतर मातीचा भराव टाकून रस्ता दुचाकींसाठीही कायमचा बंद करून टाकला आहे. त्यामुळे स्थानिकांत संताप पसरला आहे.

अचानक मातीचा भराव टाकून रस्ता बंद केल्याने नियमितपणे दुचाकी घेऊन जाणाऱ्यांची तारंबळ उडाली. सकाळी सांतान चर्चजवळ पोहोचल्यानंतर रस्ता बंद केल्याचे समजले. रस्ता बंद केल्याने पणजी आणि जुने गोवेकडे जाणाऱ्यांना लांब फेरा पडला.

बांधकाम खात्याला घेरावचा इशारा

गेल्या रविवारी कुडका-बांबोळी-तळावली पंचायतीचे उपसरपंच विनेश आडपईकर, पंचसदस्य मारिया डिकुन्हा, आपचे नेते प्रा. रामराव वाघ व सांतानवासीयांनी एकत्र येऊन रस्त्याच्या कामाबाबत स्पष्टीकरण देण्यासंदर्भात सरकारला जाब विचारला होता.

तसेच सात दिवसांच्या आत स्पष्टीकरण न दिल्यास सार्वजनिक बांधकाम खात्यात येऊन घेराव घालणार असल्याचा इशारा दिला होता.

चौकशी करा !

रस्त्याच्या बाजूची सरंक्षण भिंत ही जुलै २०२३ मध्ये कोसळली होती, आता आम्ही जानेवारी २०२४ मध्ये पोहोचलो आहोत. हा रस्ता बंद झाल्याने सर्वसामान्यांना त्रास होत आहे. कोणतीही पूर्वसूचना न देता रस्ता बंद केला, परंतु संरक्षण भिंत कोणत्या कारणांमुळे कोसळली याची सविस्तर चौकशी दक्षता खात्याद्वारे झाली पाहिजे. कंत्राटदाराची आणि अभियंत्याची चौकशी व्हावी, अशी मागणी स्थानिकांनी केली.