Goa Corona Update: दिवसेंदिवस नवीन रूग्णसंख्येत वेगाने वाढ होत असल्याने राज्यात कोरोनाची धास्ती वाढू लागली आहे. गेल्या 24 तासांमध्ये एकूण 34 नवीन कोरोना रूग्ण आढळून आले आहेत.

शुक्रवारी 55 तर गुरूवारी 16 नवे कोरोना रूग्ण आढळून आले होते. राज्यातील सक्रीय रूग्णसंख्या आता 190 वर गेली आहे.

मुख्यमंत्री डॉ. प्रमोद सावंत यांनी काही दिवसांपुर्वीच एच३एन२ आणि कोरोनाच्या वाढत्या प्रसाराच्या पार्श्वभुमीवर सावधगिरीचे आवाहन राज्यातील नागरिकांना केले होते. दरम्यान, गेल्या 24 तासांमध्ये एकूण 621 चाचण्या करण्यात आल्या.

तर एकूण 22 रूग्ण कोरोनामुक्त झाले. राज्यात गेल्या 24 तासात कोरोनामुळे एकही मृत्यू झालेला नाही. तर कोरोनामुक्तीचा दर 98.38 टक्के इतका होता.

राज्यात आत्तापर्यंत 21 लाख 57 हजार 486 चाचण्या झाल्या आहेत. तर एकूण 2 लाख 59 हजार 449 रूग्ण आढळून आले होते. त्यापैकी 2 लाख 55 हजार 246 रूग्ण बरे झाले. राज्यात आत्तापर्यंत कोरोनामुळे 4013 मृत्यू झाले आहेत.