पेडा-बाणावली येथे पत्‍नीसोबत भाड्याच्‍या खोलीत राहणाऱ्या विश्‍वनाथ सिदनाळ (वय 35 वर्षे) या मूळ लोंढा-कर्नाटक येथील युवकावर कुणीतरी तीक्ष्ण हत्याराने हल्‍ला करून खून केल्‍याची धक्कादायक घटना उघडकीस आली.
यामागे अनैतिक संबंध हे कारण असावे, असा प्राथमिक निष्‍कर्ष व्यक्त करण्‍यात येत आहे. याप्रकरणी आम्ही अज्ञातावर खुनाचा गुन्हा नोंद केला आहे, अशी माहिती दक्षिण गोव्याच्या पोलिस अधीक्षक सुनीता सावंत यांनी दिली. सध्या पोलिस विश्‍वनाथच्या पत्नीची चौकशी करत असल्याची माहिती सूत्रांकडून मिळाली आहे.
हा खून रविवारी झाला असावा, असे सांगण्यात येत असून त्याचा मृतदेह आढळला, त्याला मुंग्या लागल्या होत्या. एक युवक विश्‍वनाथ याचीच मोटारसायकल घेऊन जातानाची छबी रस्‍त्‍यावरील सीसीटीव्‍हीत टिपली आहे.
आई जेवण घेऊन आली अन्...
ही घटना रविवारी घडली असावी, असा निष्‍कर्ष आहे. सोमवारी पहाटे 4 वाजण्‍याच्‍या सुमारास विश्‍वनाथ याची पत्‍नी घराबाहेर पडली होती. विश्‍वनाथची आई सुरावली येथे राहते. आज (मंगळवारी) दुपारी ती आपल्‍या मुलाला जेवण घेऊन आली असता,
तिला हा प्रकार दिसून आला. तिने शेजाऱ्यांना बोलावून घेतल्‍यावर पोलिस तक्रार करण्‍यात आली. पोलिसांनी घटनास्थळी श्‍वानपथकाच्या साहाय्याने खुन्याचा माग घेण्याचा प्रयत्न केला.
पोलिसांचे पथक खानापूरला रवाना
हा खून केल्यावर संशयिताने विश्‍वनाथच्याच दुचाकीचा वापर करून मडगाव रेल्वे स्थानक गाठले. त्यानंतर त्याने ती दुचाकी तिथेच टाकून रेल्वेने पलायन केल्याचा पोलिसांचा कयास असून तो खानापूरला गेला असावा,
अशी शक्यता गृहीत धरून तिकडे पोलिस पथक पाठविले आहे. खुनी कोण असावा, याचा सुगावा पोलिसांना लागला असला तरी त्याचे नाव त्यांनी अद्याप उघड केलेले नाही.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.