Goa Forward डॉ. बाबासाहेब आंबेडकर जयंतीदिनी गोवा फॉरवर्डचे नेते तथा फातोर्ड्याचे आमदार विजय सरदेसाई व त्यांच्या कार्यकर्त्यांनी मडगाव येथील हॉस्पिसियो इमारतीच्या आवारभिंतीच्या रंगरंगोटीला सुरूवात केली.

सदर काम पोलिसांच्या उपस्थितीत झाले. सरदेसाई यांच्या पत्नी उषा सरदेसाई, गोवा फॉरवर्डचे नगरसेवक तसेच कार्यकर्ते या कार्यात सहभागी झाले होते.

आमदार सरदेसाई यांनी सांगितले की, हॉस्पिसियोला इतिहास आहे. हे वारसा केंद्र आहे व त्याचे जतन व संवर्धन करणे हे सरकारचे कर्तव्य आहे.

मात्र, हॉस्पिसियोच्या दुरुस्तीसंदर्भात राज्य सरकार काहीही निर्णय घेत नाही. गेल्या तीन वर्षांपासून तर या वारसा केंद्राकडे दुर्लक्ष करण्यात आले आहे.

सरकारचे या इमारतीकडे दुर्लक्ष म्हणजे अन्यायच आहे व अन्यायाविरुद्ध आवाज उठविणे हे डॉ. बाबासाहेब आंबेडकर यांचे तत्व होते. म्हणून इमारतीच्या आवारभिंतीच्या रंगरंगोटीचे काम त्यांच्या जयंतीदिनी आम्ही हाती घेतलंय, असे सरदेसाई यांनी सांगितले.

दक्षिण गोवा जिल्हा इस्पितळ उभारण्यामागे केवळ वैद्यकीय सुविधा उपलब्ध करून देण्याचा हेतू होता.

मग तिथे खासगी वैद्यकीय महाविद्यालय सुरू करण्याचा विचार सरकार कसा काय करू शकते? पोलिसांची फौज पाठवून घाबरविण्‍याचा प्रयत्‍न केला जातोय. आम्ही भित्रे आहोत असे सरकारला वाटते काय

- विजय सरदेसाई, फातोर्ड्याचे आमदार