राज्यात गेल्या काही दिवसांपासून सुरु असलेल्या मुसळधार पावसामुळे विविध भागांमध्ये जीर्ण झाडे पडण्याचा घटना घडत आहेत. अशातच रविवारी सकाळ राजधानी पणजीतील चर्च स्वेअर परिसरात अंगावर झाड कोसळून 19 वर्षीय आरती गोंड या तरुणीचा मृत्यू झाला. सरकारने आता पीडित आरतीच्या कुटुंबाला चार लाखांची मदत जाहीर केली आहे. राज्याचे मुख्यमंत्री डॉ. प्रमोद सावंत यांनी सभागृहात बोलताना याबाबतची माहिती दिली.

दरम्यान, रामनगर-बेती येथील आरती गोंड रविवारी सकाळी पावसामुळे उन्मळून पडलेल्या झाडाखाली सापडली. त्यात ती गंभीर जखमी झाली. अग्निशामक दलाच्या जवानांनी ताबडतोब तिला बाहेर काढत 108 रुग्णवाहिकेमधून गोमेकॉत दाखल केले होते. तिच्यावर सकाळपासून उपचार सुरु होते. मात्र उपचारादरम्यान संध्याकाळी तिचा मृत्यू झाला.

सभागृहात बोलताना मुख्यमंत्री सावंत म्हणाले की, राज्यातील लोकप्रतिनिधींनी आपपल्या भागामधील धोकादायक झाडे किंवा फांद्याची माहिती तात्काळ उपजिल्हाधिकाऱ्यांनी द्यावी. त्यानंतर उपजिल्हाधिकारी अशा झाडांची पाहणी करुन धोकादायक झाडे तोडण्याचा निर्णय घेतील.

बाबुश मोन्सेरात यांचे निर्देश

झाड पडून युवतीच्या मृत्यूची घटना दुर्दैवी. मी लोकांना विनंती करतो की त्यांनी जीर्ण झाडांबाबतीत खबरदारी बाळगावी व अशा झाडांखाली वाहने लावू नयेत. वन खात्याकडून राजधानी पणजीतील (Panaji) धोकादायक झाडांबाबत अहवाल मागवून घेण्यासंबंधी मी पणजी महापालिकेच्या आयुक्तांना निर्देश दिले आहेत, असे पणजीचे आमदार मंत्री बाबुश मोन्सेरात यांनी सांगितले होते.