Goa Assembly Session अधिवेशनाचा आजचा पहिला दिवस बऱ्याच विषयांवर लक्षवेधी ठरला. गोव्याची राजधानी पणजीतील सर्व सरकारी इमारतींवर सोलर पॅनेल बसवणार असल्याची माहिती वीज मंत्री सुदिन ढवळीकर यांनी आज सोमवारी विधानसभा अधिवेशनात बोलताना दिली.

त्यानंतर पर्यटन मंत्री रोहन खंवटे यांनी गोव्यातील वॉटरस्पोर्ट्ससमोर महाराष्ट्रातील मालवणचे मोठे आव्हान उभे राहिले असल्याची चिंता व्यक्त केली.

त्यानंतर राहुल गांधी यांनी चार हजार किमीची भारत जोडो यात्रा पूर्ण केल्याबद्दल त्यांच्या अभिनंदनाचा प्रस्ताव युरी आलेमाव यांनी मंडल परंतु विधानसभेने तो मान्य करण्यास नकार दिला.

दरम्यान विधानसभेत किरकोळ वादाचा प्रसंग पाहायला मिळाला. या घटनेत मंत्री रोहन खंवटे आणि आमदार मायकल लोबो हे आमनेसामने पाहायला मिळाले.

काळे सूट घालून येणारे परप्रांतीय लोक राज्यातील पर्यटन धोरण ठरवत असल्याचा दावा लोबो यांनी केल्यावर सभागृहात एकच गोंधळ उडाला. यावर खंवटे यांनी लोबो यांना त्या व्यक्तींची नावे जाहीर करण्याचे आव्हान दिले.

त्यानंतर लोबो यांच्या विधानावर प्रतिहल्ला करत खंवटे म्हणाले की, 'काळे सूटववाल्यांना काही जण जवळ करतात आणि आपली खासगी जमीन विकण्याचे प्रयत्न करतात. मात्र पर्यटन क्षेत्राच्या वाढीसाठी पर्यटन उद्योगातील घटकांना घेऊनच धोरण निश्‍चित केले जाईल.'