CM Pramod Sawant: लैंगिक अत्याचाराच्या घटनांवरून अनेकदा महिलांनाच आरोपीच्या पिंजऱ्यात उभे करण्याचा प्रयत्न केला जात असतो. पण गोव्याचे मुख्यमंत्री डॉ. प्रमोद सावंत यांनी मात्र लैंगिक अत्याचाराच्या घटनांमागचे नेमके कारणच स्पष्टपणे सांगितले आहे.

मुलांवर योग्य संस्कार न केल्यानेच महिलांवर लैंगिक अत्याचाराच्या घटना घडत असतात, असे मुख्यमंत्री सावंत यांनी म्हटले आहे.

गोव्यात भारतीय जनता पक्षाच्या वतीने झालेल्या महिला दिनाच्या कार्यक्रमात बोलताना मुख्यमंत्री डॉ. प्रमोद सावंत म्हणाले की, पालकांनी आणि घरातील ज्येष्ठांनी मुलांना मुली-महिलांचा आदर करायला शिकवले पाहिजे.

महिलांबाबत कोणत्याही प्रकारचा भेदभाव करू नये, अशी शिकवण दिली पाहिजे. मुलांवर योग्य संस्कार न केल्यानेच महिलांवर लैंगिक अत्याचाराच्या घटना घडत असतात.

ते म्हणाले, बऱ्याचदा स्त्री-पुरूष भेदभावाला स्त्रीयादेखील कारणीभूत असतात. मुलीच्या जन्मावेळी जिलेबी आणि मुलाच्या जन्मावेळी पेढा असा भेदभाव कशासाठी? मुलगीच्या जन्मानंतरही पेढाच का वाटला जात नाही? असा सवालही मुख्यमंत्र्यांनी केला.

दरम्यान, महिलांना राजकीय आरक्षणाबाबतही मुख्यमंत्र्यांनी मत व्यक्त केले. ते म्हणाले की, महिलांना राजकीय आरक्षणाचे मी स्वागतच करतो. पंतप्रधान नरेंद्र मोदींनी याधीच महिलांना अनेक गिफ्ट दिली आहेत.

केंद्राच्या बेटी बचाओ, बेटी पढाओ योजनेमुळे स्त्री पुरूष जन्मदराच्या गुणोत्तरात सकारात्मक वाढ झाली.

ते म्हणाले, मोदींनी दिलेले दुसरे गिफ्ट म्हणजे घरोघरी स्वच्छतागृह. गोव्याने देखील यात मोठे यश मिळवले आहे. पीएम जनऔषधी योजनेतून अशा दुकानांमधून महिलांना एक रूपयात सॅनिटरी नॅपकीन दिला जात आहे, असेही सावंत यांनी सांगितले.