Mopa Airport Taxi Driver Protest: ग्रीन फील्ड मोपा टॅक्सी असोसिएशन आणि मोपा एअरपोर्ट लोकल टॅक्सी ऑपरेटर असोसिएशनतर्फे पेडणे येथे सुरू केलेले बेमुदत धरणे आंदोलन आज चौथ्या दिवशीही सुरूच होते.

आज वाहतूकमंत्री, पेडण्याचे आमदार, मामलेदार यांना निवेदने सादर करून मोपा विमानतळावर त्वरित पिवळ्या-काळ्या टॅक्सी स्टँडसाठी अधिसूचना जारी करण्याची मागणी केली.

निवेदनात पुढे म्हटले आहे की, मोपा येथील मनोहर आंतरराष्ट्रीय विमानतळावर पिवळ्या-काळ्या टॅक्सी स्टँडचे वाटप करण्याचे दिलेले आश्वासन सरकारने अद्याप पूर्ण केलेले नाही. आमच्या मागण्या पूर्ण करण्यासाठी शांततापूर्ण आंदोलन सुरू केले आहे.

त्यात विमानतळावर पिवळ्या-काळ्या टॅक्सी स्टँडसाठी अधिसूचना जारी करणे, 75 ते 100 टॅक्सी सामावून घेण्यासाठी जागेची तरतूद असावी, मोपा टॅक्सी स्थानकावर टॅक्सी परवान्यासाठी ज्या टॅक्सीधारकांनी पेडणे वाहतूक कार्यालयात 1342 अर्ज केले आहेत, त्या सगळ्यांना परवाने देण्यात यावेत.

टॅक्सी परवाने देताना विमानतळासाठी जमीन गेलेल्या पंचायतींना प्राधान्य द्यावे तसेच अल्पवयीन मुले असलेल्या विधवांसाठी विशेष आरक्षण ठेवणे. टॅक्सी धारकांना कमीत कमी रक्कम आकारण्यात यावी आदी मागण्यांचा समावेश असून 6 मेपर्यंत आमच्या मागण्या मान्य कराव्यात, असे निवेदनात म्हटले आहे.

या निवेदनावर ग्रीन फील्ड मोपा टॅक्सी असोसिएशनचे अध्यक्ष उदय महाले व मोपा एअरपोर्ट लोकल टॅक्सी ऑपरेटर असोसिएशनचे अध्यक्ष सुवेक गावस यांच्या सह्या आहेत.