मोरजी: कांचोळेवाडा - मोरजी येथे भरधाव थारच्या धडकेत एका महिलेचा दुर्दैवी मृत्यू झाला असून दोघेजण गंभीर जखमी झाले आहेत. या प्रकरणी मांद्रे पोलिसांनी थारचालक व वाहन मालकाविरोधात गुन्हा नोंद केला आहे.

पोलिसांनी दिलेल्या माहितीनुसार, मंगळवारी रात्री सुमारे १०.५० वाजण्याच्या सुमारास अश्वेहून मोरजीकडे भरधाव येणाऱ्या थार वाहनाने (जीए - ०३ - एएम - ९१६१) प्रथम रस्त्याच्या कडेला उभ्या असलेल्या दुचाकीला धडक दिली. त्यानंतर समोरून जात असलेल्या दोन दुचाकींना जोरदार धडक देत पुढे उभ्या असलेल्या टाटा टेम्पोवर आदळले.

या अपघातात दुचाकीवर मागे बसलेल्या एका अज्ञात महिलेचा मृत्यू झाला, तर दुचाकीस्वार देबाशीष सामल (वय ३२, मूळ ओडिशा) आणि दुसऱ्या दुचाकीवरील गतीश सामल (वय ३५, मूळ ओडिशा) हे जखमी झाले आहेत. जखमींना उपचारासाठी रुग्णालयात दाखल करण्यात आले आहे.

अपघातानंतर थारचालक विक्रम अशोक गाबा (रा. हरियाणा) हा वाहन घटनास्थळी टाकून फरार झाला. संबंधित थार वाहन खासगी असून ते भाडेतत्त्वावर चालविण्यास दिल्याप्रकरणी वाहनमालक रोहित राठोड याच्याविरुद्धही कारवाई करण्यात आली आहे.